CARACAS, VENEZUELA, AFP.- E kandidato di un partido chikí na Venezuela a pidi Tribunal Supremo di Hustisia (TSJ) pa anulá elekshon pa skohe un opositor, relashoná ku elekshon presidensial di 2024.
“Nos ta introdusí un amparo konstitushonal kontra e proseso di elekshon “, segun Luis Ratti riba Twitter. E ta un empresario disidente di chavismo ku a partisipá den elekshon presidensial na 2018, temporada ku presidente sosialista Nicolás Maduro a wòrdu reeligí, entre akusashonnan di “froude” i un bòikòt di mayoria opositor.
Ratti a pidi pa nombra un komishon nobo pa organisá e e elekshon, “limpiá e proseso” i “garantisá demokrasia”.
E aliansa opositor venezolano, Plataforma Unitaria, a rechasá akshon di e dirigente aki. E ta wòrdu konsiderá komo un “personahe negativo” ku ta aktua na benefisio di Maduro.
Ratti a hustifiká e petishon di anulashon komo konsekuensia di un “sekuestro polítiko” di e proseso di parti di e partidonan mayoritario, na kosto di otro sektornan opositor. E ta akusá e komishon di a rechasá kandidatonan.
E elekshon ta wòrdu organisá ya pa vários luna kaba pa un grupo di maestronan, abogadonan i konsultanan ku ta sigurá ku e proseso ta habrí pa tur esnan ku kier postulá. Sinembargo, kandidatonan akusá ku tin konekshon ku e gobièrnu chavista a denunsiá “eksklushon”.
