STRAATSBURG, Fransia (AFP).- Union Europeo lo prohibí ‘social networks’ pa menornan di 13 aña i solamente lo permití un akseso limitá i supervisá pa hóbennan te ku 15 aña na sierto plataforma, segun un plan presentá ayera pa e hefe di Union Europeo, Ursula von der Leyen. Un reakshon mundial kontra di retnan sosial a pone dirigentenan polítiko i parlamentarionan di diferente pais bou di preshon, na momentu ku a revelá un seri di estudio, pruebanan i testimonionan ku ta mustra e impaktonan negativo riba salú físiko i mental di muchanan.
“Ta yega e momentu ku Europa mester aktua”, segun Von der Leyen, durante su diskurso anual den Parlamento Europeo. “Ta nos ta disidí nos reglanan, no esnan grandi di teknologia”, segun el a atvertí.
Aña pasá Australia a bira e promé pais pa prohibí ‘social networks’ pa menornan di 16 aña, loke a sòru pa un seri di medidanan similar na otro partinan di mundu, pero e presidente di Komishon Europeo a señalá ku e bloke di 28 pais lo adoptá un enfoke mas gradual.
“Nada di plataformanan sosial promé ku 13 aña”, i “nada di kuentanan personal promé ku 15 aña”, segun e presidente ehekutivo den un diskurso den Parlamento. “Di e manera akí, muchanan entre 13 i 15 aña solamente por tin sierto akseso na sistemanan supervisá pa nan mayornan, ku funshonnan restringí i un tempu di uso limitá. “I pa e hóbennan entre 15 i 18 aña, e plataformanan lo ta obligá pa adoptá un diseño sigur”, el a agregá.
Promé ku a presentá e plan di Union Europeo, Von der Leyen a rindi homenahe na un adolesente di 14 aña na Bélgika, yamá Olea, kende a kometé suisidio despues di ofensanan risibí, i a sita su mama: “mi ta sigur ku sin e plataformanan ei, mi yu ainda lo t’aki”.
