Proyekto Bienestar di
Animal di Minister Silvania…
WILLEMSTAD.- Proyekto Bienestar di Animal a sigui e fin di siman ku a pasa. E biaha aki den bario di Koraal Specht riba tereno di stashoná outo di Schotborghschool. Bastante persona di Koraal Specht i bisindario a akudí ku nan animal di kas stimá pa ‘chip’ i registrá esaki. Pa esnan ku no a haña chèns e fin di siman ku a pasa, por akudí djasabra awor 10 di mei na e lugá di stashoná outo na ADC na Vredenberg.
Un total di 67 kachó a wòrdu di ‘chip’ djasabra tras di lomba. E organisashon ta gradisí tur esnan ku a pasa ku nan animal i alabes ta hasi un apelashon na komunidat pa hasi uso di e oportunidat úniko akí i laga ‘chip’ bo animal. Abitantenan di Koraal Specht ku pa kualkier motibu no por a transportá nan kachó no mester preokupá. E siman akí, di djaluna dia 5 pa djabièrnè, dia 9 di mei kolaboradónan di e proyekto lo ta den bario di Koraal Specht pa duna informashon i ‘chip’ kachó, pero mester traha un sita promé ku e Inspektor di Bienestar di Animal via number di WhatsApp 667 0163.
E proyekto akí i e ban topa a bira posibel danki na e bon kooperashon entre Ministerio di GMN i vários organisashon no gubernamental manera; Rescue Paws Curaçao, Stichting Dierenhulp Curaçao i otro organisashonnan di bienestar di animal. Pa mas informashon relashoná ku sterilisashon i/ òf ISO ‘chip’ bo kachó bo por manda un mensahe di WhatsApp pa Rescue Paws riba number di telefòn 522 5262 òf Stichting Dierenhulp riba number di telefòn 561 7171. Tambe por “WhatsApp” Ministerio di GMN na 566 4466 òf sigui nos riba plataformanan sosial.
