WILLEMSTAD.- Riba proposishon di minister di Desaroyo Sosial, Labor i Bienestar, Ruthmilda Larmonie-Cecilia ta trahando riba e posibilidat pa introdusí kambio den penshun di behes. E kambio ta enserá ku den futuro ta dependé di un penshonado su entrada si e ta bin na remarke pa risibí e penshun di behes, AOV.

Na hulandes ta usa e terminologia “inkomensafhankelijke pensioen”. E base di paga prima ta keda mesun kos, esta tur hende tin ku paga e prima di AOV a base di su entrada bruto. Ta na momento di kuminsá kobra e penshun lo ke trese sierto kambio.

E kambionan aki ta enserá ku dependé kuantu entrada e penshonado tin for di otro penshun(nan), ta kuantu e ta kobra di e penshun di behes, AOV. Ekspertonan di Banko di Seguro Sosial (SVB) ta studiando e posibilidat pa introdusí e tipo di kambionan aki.

Tabata minister Larmonie-Cecilia ku a presentá e idea aki komo alternativa pa e medidanan ku Hulanda ta proponé pa solushoná e défisit den fondonan di SVB. Un medida proponé pa Hulanda ta subi edat di penshun bai 66 aña.

E proposishon tabata inisialmente pa subi e edat di penshun te na 67 aña entrante 2023. Pero e Coordinatie Monotoring Team bou di eks gabinete Rhuggenaath a mustra den deliberashonnan ku Hulanda ku situashon den Karibe ta otro for di na Hulanda i no por sigui hisa e edat di penshun sin mas.

A kumbiní ku ta subi edat di penshun na 66 aña na 2025, pero solamente despues di un investigashon profundo riba konsekuensianan di e medida aki. Larmonie-Cecilia sinembargo ta kere ku un alternativa di penshun ku ta dependé di e entrada di un penshonado, por trese solushon duradero pa e fondo di AOV, sin ku mester hisa edat di penshun i sin ku mester hisa e prima ku ta paga.

Un di e interogatorionan grandi di e proposishon aki ta, unabes un hende ta paga prima e ta krea un derecho atkerí pa kobra e penshun di AOV, meskos ku tur otro persona ku a paga i asta no a paga prima nunka den nan bida.

1 COMMENT

  1. Un bia mas un gobierno ta trata huntu ku SVB di kita die penshonadonan parti di nan AOV,
    Awor ta tin un minister ku ta karga e kartera di SOCIALE ZAKEN,di inventa un wiel nobo pa gewoon roba di e hende ku ta kobra AOV lo mas ku e por, ku e kuenta ku e AOV ta bai depende di e inkomen di e ansianonan aki. E hende ku ta kobra AOV, TIN DERECHO di kobra e penshon kompleto ku kaba a wordu minimalisa lo mas posibel,asina ta ku esun ku ta biba den eksterior,ta kobra 10% menos i no tin mas e dertiende maand na desember. E minister ke waak otro penshon ku e AOVer por tin.Awel, e sra. aki NO ta sa ku na Hulanda ora bo tin un penshon di Korsou of otro paisnan, e bedrag ta wordu deskonta kompleto di e penshon di Hulanda? I maske ku bida ta hopi pero hopi mas karo na Hulanda, e AOW total ku AIO na Hulanda ta 70% di e algemene AOW di e pais. I e minister aki ke kita esaki tambe di e penshonadonan? SVB kaba a trapa varios bia riba derechonan di e penshonadonan ku a gana e derecho aki dor ku durante hopi anjanan nan a aporta i paga pa AOV pa ora nan ta hende grandi,nan por biba di nan penshon. E minister aki no ta di Sociale zaken maar ASOCIALE ZAKEN. Pakiko e sra. aki no ta kuminsa na baha gastonan di su mes salario i esun di e otro ministernan,di e directie di SVB i di tur e ambtenarij di ambos instansianan ku ta yen di parasietnan asosial na luga di sigui buska manera di subi riba e palu di mas delega ku ta e penshonadonan mes.E NO tin berguensa. Tur kos pa pueblo nan ta bisa antes di elekshon.Ora nan ta sinta, e kantika ta otro: na da mas pa e pueblo!!! E ta bira ora ku e penshonadonan tur,pero tur, ta uni i ku un bon abogado ta inisia un kaso kontra gobierno,kontra e minister aki i kontra SVB pa defende nan derecho na kobra nan penshon kompleto,sin diskriminashon,sin deskuentonan di ningun tipo, i nan derechonan komo ser humano.E penshonadonan ya nan a kontribui na e pais aki. Awor esun ku tin ku kontribui ta e hende manera e minister aki i su hende, no e ansianonan.

LAGA UN KOMENTARIO

Please enter your comment!
Please enter your name here