WASHINGTON (AFP).- Un wes federal norteamerikano a suspendé parsialemente un dekreto dje presidente Donald Trump ku a imponé sanshonnan riba un importante bufete di abogado, Perkins Coie, ku a traha pa e demokratnan durante di su promé kampaña elektoral den 2016.
Dia 6 di mart, Trump a firma un dekreto pa penalisá e bufete. “E aktividat deshonesto i peligroso” di Perkins Coie LPP “ a afektá e pais akí durante di dékadanan”, segun e teksto ta bisa.
E órden ehekutivo presidensial a pidi pa e agensianan federal suspendé e outorisashon di seguridat dje abogadonan di e firma, ku ta permití nan pa mira informashon protehá i pa restringí nan akseso na edifisio- i funshonarionan gubernamental.
Perkins Coie djamars a presentá un demanda kontra dje gobièrnu di Trump, alegando ku ta “purba na intimidá” su oponentenan.
Den e oudiensia di ayera, e wes Beryl Howell parsialmente a bai di akuerdo ku petishon dje firma i a suspendé un parti dje dekreto.
Durante dje kampaña elektoral di 2016, Perkins Coie a enkargá un empresa pa investigá un posibel relashon entre Rusia i e ekipo di Donald Trump.
For di despues di a regresá White House dia 20 di yanüari, Donald Trump a tuma medidanan di represaya kontra di oponentenan, entre kua funshonarionan di partikularmente Departamento di Hustisia i FBI, komo tambe di polis federal.
Perkins Coie, un empresa fundá mas ku un siglo pasá, ta konta ku 2.500 empleado, di kua sigur mitar ta abogadonan.
