NEW YORK, MERKA, AFP.- Korte di apelashon di estado di New York a suspendé pèrmit di Rudy Giuliani pa ehersé komo abogado temporalmente. Motibu pa esaki ta dor ku el a sigurá ku Donald Trump a pèrdè elekshon presidensial di 2020 debí na froude.
Giuliani, kende tabata alkalde di New York durante ocho aña a yuda Trump desafiá resultado di elekshon presidensial di novèmber 2020, di kual e demókrata Joe Biden a gana. El a bisa ku tabatin froude elektoral i ku a alterá e mashinnan di votamentu sin duna prueba pa e akusashonnan aki.
“Tin prueba ku e abogado a hasi deklarashonnan falsu i engañoso den korte, na legisladornan i públiko en general den su kalidat di abogado di eks presidente Donald Trump i e kampaña di Trump”, segun deklarashon di korte.
E kondukta di Giuliani “ta un menasa pa interes públiko i meresé suspenshon interino di práktika di lei” te despues ku e komité di keho di abogado evaluá e kaso, segun indikashon di korte den un informe di 33 página.
Giuliani por apelá e desishon pero e ta enfrentá “sanshonnan permanente sustansial” na final di e prosedimentu.
