Faneyte: Cooper ta e Chamo di gobièrnu/MFK
WILLEMSTAD.- E reakshon di di minister Charles Cooper (MFK) riba e ponensianan di Maria Liberia-Peters a eksponé aki su mente koruptivo i maligno. Asina miembro di partido PAR, Luigi Faneyte ta konkluí despues di a tuma nota di loke Cooper a deklará den prensa.
“Nos a tuma nota di e reakshon di minister Cooper, riba e ponensia di a Liberia-Peters ku ta un persona ku un trayektoria largu i ku hopi eksperensia den polítika i gobernashon. Liberia-Peters a bisa ku gobièrnu mester ta transparente riba e prosesonan relashoná ku propiedat di pais i den e kaso spesífiko aki ku negosiashonnan riba futuro di refineria Isla. El a referí direktamente na e forma ku a yega na un kontrato di hür entre Refineria di Kòrsou (RdK) i e kompania Oryx Midstream.”
Segun Faneyte, miéntras Cooper sa ku e manera ku gobièrnu di MFK i PNP a aktua ta robes, e ta maniobrá i purba di skonde e akto “siniestro” di su gobièrnu bisando manera nada robes no a pasa ku ta un simpel akuerdo entre dos kompania privá i ku gobièrnu no tin ku duna splikashon riba esaki. “Esaki ta un pensamentu i komportashon típiko di un hende ku ta kometé algu robes, miéntras e sa ku un akto kriminal a tuma lugá.”
Mas aleu Faneyte ta bisa ku e komportashon di Cooper ta igual na e komportashon típiko di “Chamo”. “Ora gara ‘Chamo’ den kayente di su akto e ta bisa semper ku e no sa di nada paso e no tabata presente òf e no ta esun responsabel. Asina e ta purba laba su man i semper ta para riba un nò. Cooper ta pues e Chamo di gobièrnu.”
Faneyte ta sigui splika ku e echo ku e RdK ta lantá a base di leinan privá (“privaatrecht”) no ta kita ku gobièrnu komo akshonista, esta representando e doño di RdK ku ta pais Kòrsou, no tin ku responsabilisá su maneho den kuadro di transparensia konforme lei atministrativo (“bestuursrecht”). “Al final ta den un reunion di Konseho di Minister (gobièrnu di Kòrsou) ta yama un reunion general di akshonista pa tuma un desishon final, pues mester responsabilisá e toma di desishon aki na doño di RdK ku ta pueblo di Kòrsou.”
Segun e miembro di PAR mester duna transparensia tambe pa pueblo sa si bo a hasi bo máksimo esfuerso pa akshonista risibí e mihó benefisio posibel. “Es mas desensia mes ta poné ku un persona mester informá doño di kos ora e hasi algu ku tin impakto, pero den e kaso di e dil entre RdK i Oryx Midstream ta parse ku ta trata mas bien di un ‘inside job’ entre amigunan. Su mes promé minister, Gilmar Pisas a bisa ku el a bai reunion sekreto na London pa seya e dil entre Rdk i Oryx Midstream i el a gradisí su partner PNP pa tene esaki sekreto pa pueblo.”
Foto:
…Luigi Faneyte…
