BOGOTA, AP.- Masha hopi taksista di diferente siudat di Colombia a kuminsá un wèlga djárason reklamando e gobièrnu pa kanselá un aplikashon di e plataforma Uber den e pais.
E taksistanan ta sostené ku e servisio Uber ta ruinando nan.
“Mi tin mas di 20 aña trahando komo taksista na Bogotá. Mi a eduká mi dos yunan ku mi trabou pero for di momentu ku Uber a yega den e pais aki mi ta sinti mi perhudiká paso tin dia ku mi no ta traha sèn”, asina taksista Jose Conteras a bisa na The Associated Press.
E hefe di prensa di Polis di Tráfiko i Transporte, Diego Rosso, a señalá ku e paro di taksistanan a realisá di forma pasikiko den e siudatnan prinsipal di e pais manera Bogotá, Cali, Medellin i Barranquilla.
E alkalde bogotano Enrique Penalosa a pidi taksistanan pa evitá “kualkier alterashon di òrdu públiko”.
E taksistanan a dirigí for di sinku punto di e siudat te na Plaza di Bolivar, den sentro, den un karavana ku ta wòrdu vigilá pa mas di 1.500 polis.
Uber ta un aplikashon pa telefòn selular ku ta konektá usuarionan ku shofùr di outo partikular i aktualmente tin kobertura den 11 siudat den Colombia.
