KABUL, AFGANISTAN, AFP.- Talibannan a atvertí djaluna ku lo tin konsekuensia pa Merka i su aliadonan si prolongá e evakuashon di Afganistan, kual mester finalisá pa 31 di ougùstùs. Washington i su aliadonan ta konsiderando e posibilidat pa ekstendé e deadline pa finalisá e evakuashonnan di aeropuerto di Kabul.
“Si Merka òf Reino Uní pidi pa mas tempu pa sigui ku e retirada, e kontesta ta no. Of nan mester karga e konsekuensianan”, asina Suhail Shaheen, bosero di Taliban a bisa na e kanal britániko Sky News.
G7 lo reuní awe pa papia tokante e prosedernan di e evakuashon, meimei di preshon di Europa pa ekstendé presensia militar den Kabul.
Desde ku nan a gara poder di Afganistan riba 15 di ougùstùs, e talibannan ta purbando di konvensé e pueblo ku e régimen aktual lo ta ménos brutal ku esun anterior, di entre 1996 ku 2001. Apesar di nan promesanan, míles a hui òf kier hui di e pais.
E konsehero di seguridat nashonal di Merka, Jake Sullivan, a bisa na periodistanan ku Kas Blanku kier evakuá tur siudadano promé ku 31 di ougùstùs, ounke el a atmití ku gran parti di esnan ku ta sali tur dia ta afganonan.
