K A BUL ( A P ) . – E talibannan a afirmá ayera ku seis sòldá merikano di OTAN a muri ora un bòm ku nan a pone den un kaminda na ost di Afganistan a eksplotá.
E bosero taliban Zabiullah Mujahid a bisa ayera ku e sòldánan a muri ora nan tanki a dal den e bòm djadumingu och’or djanochi den provinsia Wardak, na sùit di Kabul. E Organisashon di e Tratado di Atlántiko Nort no a revelá e nashonalidatnan di e sòldánan ku a muri, pero outoridatnan afgano a afirmá ku nan tabata merikanonan. E hefe di polis di Wardak, general Abdul Qayum Baqizoi a informá ku despues di e eksploshon den distrito Jalrez, un atake aéreo di e koalishon a mata un komandante taliban i a heridá tres rebelde.
Den e mesun region afgano, outoridatnan a bisa ku un fiskal di provinsia Ghazni a wòrdu asesiná ayera mainta miéntras e tabata stür su vehíkulo rumbo su trabou.
