…Outoridatnan taliban a drenta studio di un radio emisora ku ta konta ku empleadonan femenino i a sera esaki. Gobièrnu taliban ta prohibí hende muhé pa traha…

KABUL, Afganistan (AFP).- Outoridatnan taliban di Afganistan a tene un entrada na e radio emisora Begum, destiná pa e públiko femenino, arestando dos empleado, miéntras ku e ministerio di informashon a indiká ku e operashonnan dje radio emisora a keda suspendé.
“Agentenan di Direkshon General di Inteligensia (GDI), ku asistensia di representantenan di Ministerio di Informashon i Kultura, a drenta e instalashonnan di Begum na Kabul”, segun e emisora a bisa den un komunikado, pidiendo pa pronto liberashon di su personal. Mas aleu a bisa ku e outoridatnan taliban a tene e personal apartá mientras ku nan tabata listra den e ofisina, konfiskando kòmpiuternan, harddisc i telefònnan, i ku a detené dos empleado maskulino “ku no ta okupá ningun funshon di maneho”.
E emisora a bisa mas aleu ku lo e no tin mas komentario debí na temor pa e seguridat di e empleadonan detené, i a hasi un yamada riba outoridatnan pa “kuida nos koleganan i laga nan liber mas lihé posibel”.
Den un komunikado riba e ret sosial X e ministerio d informashon taliban a duna di konosé ku e emisora a keda suspendé pa motibu di vários violashon i tambe pa motibu di a pasa “material i programa di un stashon di televishon pafó di e pais”.
Radio Begum a afirmá ku nunka a envolví su mes den ningun aktividat polítiko i ku e ta “komprometé na sirbi e pueblo afgano i, mas spesífikamente, e hende muhé”.
E emisora a keda funda riba 8 di mart di 2021, Dia Internashonal di Hende Muhé, sinku luna promé ku talibannan a tuma poder despues di a derotá e gobièrnu respaldá pa Merka.
E outoridatnan a imponé restrikshonnan generalisá riba hende muhé, sakando nan for di bida públiko ku reglanan ku Nashonnan Uní a denominá o “apartheid di género”.

LAGA UN KOMENTARIO

Please enter your comment!
Please enter your name here