Tap Maar In; mi trabou ta mi bida

Nina van de Ree a selebrá 35 aña komo propietario i manehadó di Tap Maar In. Anto ken no konosé Tap Maar In. Na kuminsamentu di Sta. Rosaweg, djis pega ku landhuis Bloemhof. Komo hende muhé na kabes di un bar e ta konta nos su eksperensia. Esaki otro ehèmpel ku trabou ta pa tur hende i no esaki pa hende muhé i esaya pa hende hòmber, Djasabra ta pone Nina van de Ree den e lus di dia spesial den kuadro di dia di hende muhé mañan djadumingu 8 di mart.

 

Nina a kuminsá…..

Nina van de Ree a traha 3 aña na ‘t Cafeetje na Caracasbaaiweg. Tabata un negoshi di su amigunan. El a bai yuda nan i a haña e trabou asina leuk ku el a disidí na keda, te el a bira mènedjer. Dado momentu e huntu ku un otro partner a disidí ku nan ke bai riba nan mes i asina nan a habri Tap Maar In na Sta. Rosaweg.

Serbes tap na moda…

E lokashon di Tap Maar in ta esun di mas ideal, Nina  a splika ku ta su partner den negoshi a haña el okashon ei i tabata netamente loke nan tabata buskando. Un cafe chikitu. Pa loke ta e nòmber Nina a konta nos ku e tempu ei tabata nèt ku serbes tap a bin na moda i p’esei nan a yama e bar/cafe aki Tap maar In.

Nunka mi a imaginá esaki….

Komo hende muhé manehando un cafe/bar nunka el a imaginá su mes i te el a yega 35 aña. Pero tabata un trabou ku semper el a gusta i esaki ta su bida. E ta gusta su trabou e gusta traha ku kliente/wéspetnan. Esaki a sòru ku Nina a kumpli resientemente 35 aña ku Tap Maar In.

E trabou di anochi a kumbinié….

Nina ta un mama ku 2 yu hòmber. E yunan ta un tiki mas chikí ku e 35 aña ku e ta den e negoshi aki. Tur dos a bai studia na Ulanda i ta trahando. Unu tin asta su propio negoshi. Nina a konta nos di Djasabra ku siendo un mama ku ta sali su kas atardi te mardugá, semper e por a konta ku su mama pa a yud’é. E tabata hopi difísil si i ta danki na su mama ku a yud’é. Su mama ta e di dos mama pa su yunan. Su mama tabata yuda prepará e muchanan i hiba nan skol. Nina a splika ku tur kos tin su pro i kontra i den su kaso e bon di su trabou tabata ku e por a hasi hopi kos ku e yunan den dia. Por ehèmpel kualke salida ku skol Nina tabat’ei, e tabata den komishon di mayor i yuda na skol. “Unda mi a saka e energia ei mi no sa, pero awor ku mi a bira grandi lo mi no por mas. Mi tabata hopi aktivo den dia ku nan i ora mi tin di bai traha ya tur kos ta hasi, hùiswèrk ta traha i ta praktikamente ora e muchanan ta kla pa bai drumi”, asina Nina a konta nos.  Ku esaki el a splika ku a kumbinié traha anochi.

E wéspetnan mes tabata yuda tene kontròl….

Manehando un bar no ta fásil. Bar por tin momentunan difísil, hende por bebe i hasi basta laf. Den e kaso aki Nina a splika ku su klientenan semper a yud’é kontrolá e situashon ku por presentá. Awor aki tempu a kambia i kos ta poko difísil, bo mester ta muchu mas kuidadoso. Dia el a kuminsá kos tabata otro. Un bia tabatin un insidente i su wéspetnan mes a para kla pa yud’é. Awor aki si kos ta poko mas difísil, tempu ta otro. E tabatin gana pa un di su yunan a sigui kue negoshi pero niun di dos no tabata ke. Un di e yunan a asta bis’é ku e lo studia fuerte pa e bo tin di traha asina duru manera su mama.

 

Situashon ta difísil….

Pa loke ta e parti ekonómiko ku hopi kompania pasando den tempunan difísil Nina a splika ku den e kaso aki tambe ta un diferensia ku tempu el a kuminsá. E tempu ei no tabatin asina tantu lugá pero awendia tin hopi lugá pa bai sinta bebe i kome algu. Den su kaso e tin su anochinan di karoake 3 bia pa siman. Tambe e tin happy hour tur dia ku ta hopi eksitoso. Ademas komo e lugá ta chikí i hende a kustumbrá kuné, e por gosa asina di e atenshon di su wéspetnan. Ademas Nina tin su klientenan ‘vast’ i asta un di dos generashon ku ta biniendo.

Tap Maar In ta ‘cozy’….

Tap Maar In ta un negoshi bastante chikí, Nina ta kòrda ku el a yega di haña diferente oferta di lugánan mas espasioso. Pero loke tin e einan ta e ambiente “cozy” i tambe e lokashon. Tur hende ku pasa sea Schottegatweg òf Sta. Rosaweg no por hera e cafe. Si e bai den un lugá mas grandi e tin di buska mas hende pa traha, e ta bira henter un maneho i esei no ta loke Nina lo ke. E mes ta gusta ta den e negoshi. E gusta atendé su wéspetnan.

 

No tabata fásil….

Pa loke ta maneho di negoshi Nina a konta Djasabra ku e por ta fásil si ta algu ku bo ta gusta. Tin hopi kos ta bin aserka den maneho di negoshi. Den su kaso e mes ta hasi tur kos, e mes ta hasi kompra i ta su ‘boekhouding’ so hende ta hasié pe pa e ta bon hasí. E úniko kos ta ku ta hopi ora pasobra ta e so ta hasi tur kos. E ta habri for di 5 or di atardi kaminda tin Happy hour te 7 or tur dia i despues ta sigui te 1 or mardugá i tin biaha te 3 or i asta 5 or di mainta, riba e dianan di karoake.

 

Tap Maar In ta Tap maar In…

Loke ta hasi Tap Maar in spesial ta ku Tap Maar In ta keda Tap Maar In. E chikí ku e ta pone e hende sintié manera un famia. Tur hende ta konosé otro. e ta manera un famia. Ku un sonrisa riba su kara Nina ta kòrda ku tempu el a kuminsá 35 aña pasá su mama no tabata masha di akuerdo pe komo hende muhé den un bar. Su mama no a ferwaktu esei pa su yu muhé pero e mama a bira orguyoso si dje. Kada aña Nina ta organisá algu por ehèmpel ora el a kuminsá 35 aña tur bibida tabata 3,50 florin i el a haña hopi flor pero e promé tabata di su mama. I si kos keda manera e ta, e lo ta hopi mas den Tap Maar In.

 

 

SHARE

LEAVE A REPLY