WILLEMSTAD – Entrante djamars dia 3 di sèptèmber 2019 e tarifa regulá di gasolin lo baha i e tarifa di diesel lo subi na Kòrsou. Tambe tarifa di awa i elektrisidat lo subi entrante djadumingu dia 1 di sèptèmber 2019. Esaki Bureau Telecommunicatie en Post (BT&P) ta partisipá den su komunikado mensual riba e partikularidat aki. BT&P ta supervisá e desaroyo di preis di produktonan petrolero i di utilidat.
Kálkulo tarifa produktonan kombustibel
E kálkulo di tarifa pa Mogas 95, Gasoil LSD, LPG 20 i LPG 100 konosé e komponentenan 1. Preis di kompra, 2. Impuesto di importashon LSD, 3. Márgen pa Curoil, 5. Sùrplùs/Défisit (Recovery), 6. Supsidio krusá, 7. O.B. di 6% pa benta por mayor, 8. Márgen pa agente i 9. O.B. di 6% pa benta por detal. Pa sierto komponente e tarifa sero ta konta – sea temporalmente òf nò –. E tarifa pa benta por mayor ta inkluí e promé shete komponentenan miéntras ku e tarifa pa benta por detal (na usuario final) ta inkluí tur nuebe komponente.
Ta determiná e preis di kompra, kaminda kalkulashon ta kuminsá, mensualmente pa e luna siguiente a base di Curoil su fakturanan di kompra di e luna anterior. Pues: e preisnan di kompra ku ta stipulá pa sèptèmber, ta basá riba Curoil su fakturanan di kompra di yüli. E preisnan di kompra akí ta wordu revisá dor di notashon di preis internashonal. Ta tene kuenta tambe ku otro eventual gastunan, relashoná ku e kompra, por ehèmpel gastunan di inspekshon. Dor di e lapso di dos (2) luna den e mekanismo pa determiná preis, por ta nesesario pa deskontá eventual diferensia entre e preis di kompra regulá i e montantenan di kompra real, di forma retroaktivo via e elemento ‘Sùrplùs/Défisit’.
E bahada di e tarifa usuario final pa e produkto Mogas 95 ta prinsipalmente resultado di un bahada di e preis di kompra i un subida di e korekshon den e komponente sùrplùs/défisit. E subida di e tarifa usuario final pa e produkto Gasoil LSD ta resultado di un subida di e preis di kompra i un bahada di e korekshon den e komponente sùrplùs/défisit.
Kálkulo tarifa awa i koriente
E kálkulo di e tarifa pa awa i elektrisidat tin dos komponente: e tarifa básiko i e klousula di kombustibel. E klousula di kombustibel ta konsistí di dos elemento: kompra di koriente i gastunan di kombustibel. E ‘kompra di koriente’ ta basá riba e preis pa e energia ku tersernan ta suministrá, manera energia di bientu, di solo i di CRU. ‘Gastunan di kombustibel’ ta enserá produkshon di energia dor di Aqualectra mes. Sin embargo, kada luna e uso di e diferente medio pa produkshon – e asina yamá ‘meskla di produkshon’ ta varia. P’esei BT&P ta determiná e balor di e klousula di kombustibel mensualmente basá riba e pronóstiko di Aqualectra, di kiko e meskla di produkshon lo bira, den e kaso aki pa e luna di sèptèmber.
Si un luna despues resultá ku e elemento akí tabata muchu haltu òf muchu abou, ta korigí esaki. Den e kaso akí, ta trata di e luna di yüli. BT&P ta determiná e tarifa básiko pa tantu awa komo elektrisidat un biaha pa aña. E tarifa akí ta enserá tur otro gastu (fiho) pa e produkshon di awa i elektrisidat i tambe e gastunan pa e distribushon i e entrega di esakinan, manera gastu di personal, di mantenshon, depresiashon, etc.
E subida di e tarifanan pa awa i elektrisidat ta kousá dor di e resultado di un bahada leve den preis di kombustibel i elektrisidat pa respektivamente produkshon di elektrisidat i di awa i tambe faktor di korekshon mas haltu ofer di e luna di yüli.
Aprobashon i fihamentu
BT&P ta asesorá Konseho di Minister (KdM) enkuanto e tarifanan nobo. Solamente despues ku e KdM aprobá e propuesta, e Minister pa Desaroyo Ekonómiko, ku a la bes ta enkargá ku asuntunan di energia, ta fiha e tarifanan. Eseinan ta e tarifanan máksimo ku por usa un luna largu. Ku e prosedura akí, ku ta konsiderá faktornan internashonal i lokal, e supervisor BT&P ta vigilá e entrega di kombustibel, awa i elektrisidat na e poblashon lokal di forma independiente i transparente, pa esaki ta kontínuo i rasonabel.
