Tarifa kombustibel, awa i koriente ta keda meskos

WILLEMSTAD.- Tarifa di produktonan di kombustibel, awa i elektrisidat ta keda meskos. Esaki Bureau Telecommunicatie & Post ta informa, maneraan ta hasi na final di kada luna. Segun e informe e tarifa regulá di gasolin, diesel i LPG na Kòrsou den luna di yüli ta keda meskos i lo drenta na vigor for di djamars 30 di yüni 2020. Ta determiná e preis di kompra, kaminda kalkulashon ta kuminsá, mensualmente pa e luna siguiente a base di Curoil su fakturanan di kompra di e luna anterior. Pues: e preisnan di kompra ku ta stipulá pa yüli 2020, ta basá riba Curoil su fakturanan di kompra di mei 2020.

E tarifanan di e productonan Mogas, LSD i LPG den luna di yüli ta keda idéntiko, pues sin kambio. Esaki ta den liña ku mantenementu di e tarifanan for di mei 2020.

E kálkulo di e tarifa pa awa i elektrisidat tin dos komponente: e tarifa básiko i e klousula di kombustibel. E klousula di kombustibel ta konsistí di dos elemento: kompra di koriente i gastunan di kombustibel. E ‘kompra di koriente’ ta basá riba e preis pa e energia ku tersernan ta suministrá, manera energia di bientu i di solo. ‘Gastunan di kombustibel’ ta enserá produkshon di energia dor di Aqualectra mes. Sin embargo, kada luna e uso di e diferente medio pa produkshon – e asina yamá ‘meskla di produkshon’ ta varia. P’esei BT&P ta determiná e balor di e klousula di kombustibel mensualmente basá riba e pronóstiko di Aqualectra, di kiko e meskla di produkshon lo bira, den e kaso aki pa e luna di yüli 2020.

E tarifa aktual di awa i di elektrisidat tambe ta keda mantené den yüli i lo drenta na vigor for di djarason 1 di yüli 2020.

SHARE

LEAVE A REPLY