WASHINGTON, AP.- Gustavo Tarre a asumí e kargo komo representante nobo di Venezuela den Organisashon di Estadonan di Amérika un dia despues ku 18 pais a vota na fabor di rekonosé den Konseho Permanente.
Tarre, designá pa e lider opositor venezolano Juan Guaidó a entregá su karta kredensial na e sekretario general Luis Almagro durante un seremonia kòrtiku i a bisa ku e lo okupá e asiento korespondiente na Venezuela den e siguiente seshon di Konseho Permanente.
E abogado kende a fungi komo legislador den su pais entre 1979 i 1999 a indiká ku e tin planiá di amplia su ekipo aktual di dos kolaboradó pa logra presensia di diferente instansia di OEA.
El a agregá ku e kuater diplomátikonan leal na presidente Nicolás Maduro, kende a okupá e asiento venezolano ya a renunsiá na nan funshon. Departamento di Estado probablemente lo suspendé nan visanan.
E gobièrnu di Maduro a inisiá un trámite di dos aña riba 27 di aprel 2017, pa bandoná e organisashon i a bisa resientemente ku e pais lo tene su mes na e plan.
E resolushon a wòrdu adoptá ku 18 voto na fabor, nuebe kontra, seis apstenshon i ousensia di Belize.
OEA no ta rekonosé e segundo mandato di Maduro indikando ku su reelekshon den mei 2018 tabata froudulento.
