Angelo Elisabeth a gradua den Mode design i el a diseñá su propio tas i marka Marcus Elizabeth. Na yüni di e aña aki el a gradua Bachelor Cum Laude den Mode Design en Styling. Angelo tin 13 aña na Hulanda.

Na Kòrsou el a kaba Radulphus College i a traha un aña i mei na Kòrsou i despues a bai Hulanda pa sigui studia. Na Hulanda el a studia komunikashon promé, pero e tabatin e sentimentu pa e hasi algu ku moda i kier a kombin’é ku komunikashon. El a biba na Rotterdam, despues move pa Amsterdam. Einan el a haña e konekshon ku moda. E tabata e promé hende hòmber ku a kuminsá ku un ‘vlog’. Ounke segun Angelo for di chikí e tin e konekshon ku moda. El a nase religioso i tur djadumingu tabata bai misa. Eseinan tabata un oportunidat pe eksperensiá kon pa bisti. Paña pe for di chikí tabata masha importante pe. Ku su ‘vlog’ el a haña hopi oportunidat. El a sera konosí ku modanan grandi manera Givenchy i hopi mas. El a sera konosí ku hopi hende den moda. Angelo a bai traha komo PR pero solamente pa 6 luna i einan el a skohe pa tòg bai den direkshon pa e por tin su propio marka. El a hasi investigashon i a disidí ku tòg e tin di bai skol bek pa siña. E ke ekspresá su kreatividat, e ke konta un historia ku su artíkulonan i asina Angelo a drenta Artemis na Amsterdam un akademia di style. El a terminá su promé aña pero mester a bai London kaminda el a biba 2 aña. Einan el a sera konosí ku trahamentu di tas. Angelo tabatin un bon maestro ku ta traha tas pa e nòmbernan di mas konosí na London. I p’esei por mira esei na loke Angelo mes a produsí, ku e kalidat ta resaltá.

Despues di London pa 2 aña el a bai bèk Hulanda i terminá su skol. Na yüni e aña aki el a terminá su estudio ku tur 10 riba su diploma.

Asesorionan bunita

Segun el a konta, dia e tabata biba na Amsterdam i tabata traha na De Bijenkorf. E tabata traha pa Replay i a konosé Fabienne Abbing einan. Esei tabata su mihó amiga. Angelo a sintié yamá semper pa asesorionan; semper e tabata karga asesorionan masha bunita kuné. E no por  a bisti pañanan karu pasobra e ta studiante pero e tabata spar pa kumpra un bon brel, tas, sapatu di marka.  Fabienne tabatin konosementu den traha tas. Nan dos a klek masha bon ku otro. Nan dos huntu a traha i a krea un tas ku Angelo a yama Maxima, esaki na honor di su amiga Fabienne. Su amiga Fabienne na 2019 a fayesé di kanser, loke tabata un sla duru pa Angelo.

 

Tas di kueru i di kalidat

Despues di su promé tas, el a sigui mehor’é mas i mas. Esaki el a hasi ku e eksperensia ku el a haña na London den trahamentu di tas. Kada tas di dje tin un nòmber i koló. El a lansa e tasnan komo parti di su estudio. Angelo a bisa ku e mes por traha e tasnan pero e ta lag’é na hendenan ku tin mas eksperensia. E tasnan ta keda trahá na Spaña pa un atalier ku tabata traha Louis Vuitton. E kalidat di e tasnan ta hopi haltu. Ta trata di kasnan di kueru. Despues ku e atalier aki a wak su tasnan, nan a duna Angelo e oportunidat di traha un kantidat abou di tas pa kuminsá. Angelo a kuminsá traha 80 tas i nan ta den diferente koló. E tasnan ta na benta riba su wèpsait. Intenshon ta pa nan por drenta tiendanan. E tasnan ta karga e nòmber di Marcus Elizabeth. E Elisabeth ta pa su fam, i Marcus ta su nòmber mei mei. E diseñonan ta Maxima, Tube.

E “The Tube” ta ilustrá su eksperensia den di metro na London. Tin un kultura di hóben einan i nan semper ta usa e tipo di tasnan chikí i rondó. Einan el a keda inspirá pa usa e forma aki, ku ta algu otro di loke hende a kustumbrá kuné. E otro ta Maxima. Pa tur dos tipo di tas e tin 4 koló, e pretu, maron, bèrdè i oraño. Esun oraño ta hopi popular. E Tube tin tambe 4 koló, bèrdè, pretu, blanku (sold out) i un tipo di oraño maron.

 

Nada ta fásil den bida

Nada tabata fásil pero si bo ke logra algu bo tin di bai i lucha pe, Angelo a bisa. E sa ku el  dura poko largu ku e proyekto di su tasnan i awor e ta kla pa laga mundu sera konosí ku nan. For di 2015 el a investigá, el a kana buska, el a haña hopi “nò” pero el a perseverá. I finalmente el a logra na un Atalier kaminda e tin masha bon kontakto, nan ta komprondé kiko e ke i kiko e ke hasi. E ta un persona masha eksigente i a buska un bon kueru ku no ta machiká.

Momentunan difísil na Kòrsou

Despues di a bai Hulanda 13 aña pasá nunka mas el a bin ku no ta awor ku e ta aki ku fakansi. Angelo a konta nos ku aki na Kòrsou el a biba te ku su 21 aña i aki e no tabatin un hubentut masha bon. El a keda tentá masha hopi. Na kas tambe no tabata semper masha dushi i nan no tabata komprondé masha bon. Awor ku e ta mas grandi e ta wak e kosnan otro.  El a kuminsá e trayekto pa traha na su mes i un di e pasonan tabata ku e mester a bin Kòrsou pa tòg traha momentunan dushi na e lugánan kaminda e no tabatin su mihó momentunan. E kier a buska hendenan pa wak kon ta bayendo ku nan i pa e tin bunita eksperensia. I esei el a bin hasi awor na Kòrsou. Tur esaki e ta ripará ku a yud’é. Angelo a keda kriá pa su wela i ta danki na dje ku el a haña e chèns di studia i desaroyá su mes den e persona kreativo ku e ta awe.

Benta pasado tras di lomba 

Angelo ta bin di un famia di tres ruman hòmber. Na Kòrsou e tin famia ainda i e ta stima nan hopi. E ta tuma su tempu pa e por bai serka tur. E no ta tuma niun na malu i e no ta tuma niun hende mes na malu pa loke a pasa den pasado. Niun hende tin un buki pa splika kiko si por i kiko no por i kon e mester sosodé. Angelo simplemente ke sigui padilanti.

 

Kolekshon 1863

 No solamente e tasnan, pero tambe e ta den kreashon di paña ku e a trahando ariba. E tin asta un diseño di tela ku el a registrá riba su nòmber. E tin un buki ku ta duna splikashon di tempu di sklabitut i ta data di 1863. Esei tabata e título di su graduashon e aña aki. Pa e kolekshon aki e la kombiná su herensia di kolo skur i e tendensia di aktivismo di pretunan. El a skohe 1863 pasobra e aña ei sklabitut a bira ilegal na Sürnam i Antia. Den e kolekshon aki e ta konta e historia di Virginia Dementricia kende tabata rebelde i sa kue paña di su doñonan pa e bisti den sekreto. E kolekshon ta un blusa habrí den lomba i a usa e tela ku ta traha e nòmber di Marcus Elizabeth tambe. E tipo di paña aki ta bin di inspirashon di su wela Selma. E kolekshon aki ta un di esnan di mas importante ku Angelo a krea te awe. Ku e kolekshon aki el a gradua ku honor na Akademia Artemis na Amsterdam.

E diseño di e blusa i su kosedó ta Angelisa Elizabeth i Nicolai Egter van Wissekerke.

Modelo ta Chanelva Maclean

Fotograf ta Ingrid Polderman

Makeup i kabei ta di Naima Bremer

Asistente tabata Flavia Cibelle i Esmee Julia van der Molen

I e lugá ku a saka e foto tabata Museo van Loon

 

LAGA UN KOMENTARIO

Please enter your comment!
Please enter your name here