Team kompleto a hasi entrada hudisial na Sta. Catharina (video)

UPDATE Polis a detené dos hòmber

WILLEMSTAD – Awe mainta tempran un team kompleto konsistiendo di Wes Komisario, Fiskal, Griffier, Tim di Aresto i DGC a bai na un kas den Kaya Dorus na Sta. Catharina. Mirando tur e outoridatnan ku a presentá tempran aki pa ehekutá e entrada hudisial, ta trata sigur di un kaso grandi i importante. Ta for di 4or di mardugá e team aki a yega na e kas i mesora ku presensia enorme di poder a drenta bai paden. Te mainta aki ainda outoridatnan ta den e kas i hasiendo nan investigashon ounke ku ya Fiskal i Wes Komisario a bandoná e sitio. Presensia di e team di DGC ku ta e divishon di Krímen Organisá por indiká ku lo por tin relashon ku un  kaso di droga. A detené un persona ku pa kolmo ta ku pia kibra i a sali riba krùk.i a hib’e direkshon di warda di polis. EXTRA lo sigui e desaroyo di e kaso aki i lo informá su lektornan asina ku polis duna mas informashon ofisial.

UPDATE ++ Polis awe tardi a informá: Kontinuando ku investigashon den un kaso kaminda ku dia 18 di sèptèmber 2025 Wardakosta a interseptá un boto ku 200 kilo di kokaina a bordo, polis a hasi dos detenshon. Djamars 4 di ougùstùs 2026 e Divishon di Krímen Organisá riba òrdu di fiskal di Ministerio Públiko a detené e hòmbernan J. Ph. di 35 aña di edat i S.V. di 48 aña di edat, ámbos nasé na Kòrsou. Ph. a keda detené na S.D.K.K. i S.V. na un adrès den Kaya Dorus. Na ámbos direkshon polis a tene entrada hudisial i a konfiská artíkulonan di importansia pa e investigashon. A presentá e sospechosonan dilanti di un fiskal ouksiliar ku a ordená nan enkarselamentu pendiente di mas investigashon. ++