NEW YORK (AFP).- Ted Turner, e empresario norteamerikano ku a revolushoná e industria di televishon ku kreashon dje kadena CNN, pionero den emishon sin interupshon di notisia, a fayesé na edat di 87 aña.
E magnate di medionan, filántropo i ‘ekolohista’, den 2018 a anunsiá sufri di demensia ku Lewsy, un enfermedat neurodegenerativo ku síntomanan similar na esnan di Parkinson i Alzheimer.
E presidente norteamerikano, Donald Trump, krítiko fuerte di CNN, a despedí di dje komo “un dje grandinan di tur tempu”. Nasé na Cincinnati, Ohio, den novèmber di 1938, Robert Edward “Ted” Turner III a asistí na un internat militar den Tennessee i despues a studia na Brown University, pero a keda ekspulsá promé ku el a gradua.
Despues di a bai traha na un empresa di publisidat ku su tata, kende a kometé suisidio, el drenta televishon den 1970 ku kompra di un kanal na Atlanta. Dies aña despues, e kanal ei tabata pilar di su ret nashonal, Turner Broadcasting System, di kua e benefisiosonan a dun’é espasio pa lanta Cable News Network (CNN).
Promé kanal informativo di 24 ora, CNN a krese na Merka i despues tambe riba eskala internashonal. Su proyekto a manifestá spesialmente durante e promé guera di Golfo (1990-1991), dunando un kobertura ekstenso di forma direkto ku teknologia di satélite.
E éksito di CNN a inspirá e kreashon di vários kanal di informashon kontinuo en partikular Fox News, fundá pa su rival bieu Rupert Murdoch, MSNBC i hopi otro rònt mundu.
Den deporte e tabata doño dje ekipo di beisbòl Atlanta Braves, tambe di Atlanta Hawks di basketbòl i Atlanta Trashers di hockey riba eis.
