Ministerio di Salú di Líbano a informá ku 1.739 persona a muri i 5.873 a resultá heridá dor dje atakenan di Israel.
TEHERAN (AFP).- Presidente di Iran, Masud Pezeshkian, a bisa ayera ku un dje kondishonnan fundamental presentá pa su pais den un plan di 10 punto den negoshashon ku Merka, ta pa stòp ku e guera den Líbano. Den un kòmbersashon telefóniko ku e mandatario franses Emmanuel Macron, Pezeshkian a insistí den “e nesesidat pa stòp ku e guera de Líbano” i a rekordá ku e eksigensia aki ta un dje kondishonnan esensial den e plan di 10 punto di Irak i ku a keda aseptá pa Donald Trump komo un proposishon “aseptabel” pa negoshá ku Teheran.
Merka ta pensa otro
E visepresidente di Merka, JD Vance, di su parti a duna di konosé ku ta keda na iranínan pa disidí si e periodo di pas ta frakasá pa motibu di Líbano. “Si Iran ke pa e negosiashon aki kibra pa motibu di un konflikto relashoná ku Líbano, ku no tin nada di haber ku nan, i ku Merka nunka a bisa ku lo e mester forma parti dje desishon pa para ku e guera, esei ta nan elekshon. “Nos ta kere ku lo ta un estupides, pero ta nan elekshon”, segun Vance a deklará promé di a biaha pa Budapest.
Pa para e guera den Líbano ta un dje “kondishonnan esensial” di Iran anunsiá den su plan di 10 punto, segun e presidente iraní Masud Pezeshkian.
