CIUDAD DE MEXICO, MEXICO (AFP).- Un temblor di 5.7 grado a sakudí sentro di Mexico, segun outoridatnan lokal a informá. E episentro dje teremoto, registrá atardi pa 14:03or, a keda lokalisá den e komunidat di Chiautla de Tapia, den sentro dje estado di Puebla.
Te ku ayera tardi, no a reportá dañonan na e kapital. E presidente mehikano, Andres Manuel Lopez Obrador, dirèkt a drenta den kontakto ku outoridatnan di Protección Civil pa sa di potensial dañonan.
Sergio Salomon, gobernador di Puebla, kaminda tabata e episentro, a informá ku e temblor a keda sintí na vários parti pero ku no tin informashon di posibel daño.
E sakudimentu di tera a lòs esenanan di miedu, sigur den kapital, kaminda ku kayanan a yena ku siudadanonan ku a kai for di edifisionan na momento ku nan a tende e alerta di temblor, kual a tuma lugá un minüt promé ku e sakudimentu.
Vários avenida, manera Paseo de la Reforma, kaminda tin e edifisionan di mas haltu, a yena ku multitut di hende, hopi di nan ku telefòn den man tratando pa hasi yamada.
E temblor a tuma lugá nèt na momento Minister di Finansa di Merka, Janet Yellen, tabata riba kaya den e kapital.
Mexico ta ubiká entre sinku plaka tektóniko di kua e movementu ta hasi dje pais un di esnan ku ta registrá mayor aktividat sísmiko na mundu, prinsipalmente na e kosta di Pasífiko, for di frontera di Guatemala te ku e estado di Jalisco den parti wèst dje pais.
Riba 19 di sèptèmber di 2018, un temblor di 7.1 a laga 369 morto, mayoria den e kapital.
