SAN JUAN, AP.- Un temblor mas ku un magnitut di 5,9 a bolbe sakudí Puerto Rico djasabra i kousa daño enorme, balorá na algun mion dòler na kosta sùit di e isla.
E servisio geológiko di Merka a informá ku e temblor a tuma lugá den oranan di mainta i tabatin un profundidat di 5 kilometer. Tabatin diferente réplika ku a surgi despues di esaki, inkluyendo unu ku un magnitut di 5,2.
Outoridat no a proveé informashon di morto ni posibel herido pa e temblor aki.
E temblor di djasabra a wòrdu registrá 4 dia despues di un otro ku un magnitut di 6,5. E temblor aki a sakudí e mesun zona i a kontinuá ku mas o ménos 1.200 réplika den e último dos simannan ku a pasa.
E gobernador di Puerto Rico, Wanda Vazquez a bisa ku e dañonan di djamars ta wòrdu kalkulá na 110 mion dòler, ku un total di 559 struktura afektá. El a agregá ku su gobièrnu a kanalisá dos mion dòler pa e seis munisipionan mas afektá.
Vazquez a bisa ku e gobièrnu di Merka mester emití un deklarashon di emergensia, kual lo proveé e isla ku rekursonan federal pa lidia ku e desaster.
Gran parti di e isla tabata sin koriente dor ku algun planta a wòrdu afektá pa e temblor aki.