BOGOTÁ.- Un temblor fuerte a sakudí Colombia riba e mainta aki. A sinti e temblor ku hopi intensidat den siudatnan grandi manera Bogotá i Cali. Segun outoridatnan, e temblor a laga te awor 111 morto i un kantidat ainda no determiná di personanan heridá i daño serio na edifisionan den e parti wèst di e pais.
E movementu sísmiko a kuminsá pa 7:34 di mainta, ora lokal. Segun Servisio Geológiko Colombiano i United States Geological Survey, e tabatin un magnitut di 7,4. E episentro tabata serka di San José del Palmar, den departamento di Chocó, na un profundidat di mas o ménos 100 kilometer.
Gobernadó di Chocó a informá ku tin personanan heridá i daño grave na diferente edifisio. Un video grabá na Quibdó, kapital di e departamento, ta mustra un edifisio ku a kai kompletamente.
Medionan lokal tambe a raportá ku kasnan a kai den siudatnan manera Pereira i Manizales, den e área turístiko konosí komo Eje Cafetero.
“Tin daño hopi serio. No tin koriente ni señal di selular. E temblor tabata masha fuerte,” Martha Estrada, di 66 aña, a konta AFP.
Alkalde di Cali, Alejandro Eder, a bisa ku tin “daño grave” ku ta siendo evaluá ku ‘drone’. Presidente Abelardo de la Espriella a anunsiá ku e tabata saliendo pa Eje Cafetero pa evaluá e situashon personalmente i supervisá e reakshon di gobièrnu.
E temblor tambe a ser sintí den paisnan bisiña. Na Ecuador, habitantenan di Quito a sinti e temblor, miéntras ku na Panamá tambe a sinti e movementu den diferente provinsia. A evakuá pashèntnan for di un hospital komo medida di prekoushon. Den parti di Venezuela tambe a sinti e movementu sísmiko.
No tin alerta di tsunami
Outoridatnan enkargá ku maneho di desaster a konfirmá ku no tin alerta di tsunami despues di e temblor.
Na Bogotá, a evakuá diferente edifisio i hopi hende a sali bai kaya, miéntras ku sirena tabata zona. “E temblor tabata super fuerte,” Valeria Polo, un kreadó di kontenido di 29 aña, a deklará.
Alkalde di Bogotá, Carlos Galán, a bisa ku te awor solamente a reportá skèrnan superfisial den algun kas i edifisio. Mientrastantu, ekiponan di emergensia ta sigui evaluá e daño den henter e pais.
