Restunan mortal komo konsekuensia dje temblor fuerte ku a sakudí partinan di Afganistan. E pais ku regularidat a bin ta sinti e sakudimentu di tera, ku hopi morto komo konsekuensia.
AFGANISTAN (AFP).- Mas ku 800 persona a muri i por lo ménos 2.700 a resultá heridá na Afganistan pa un temblor di magnitut 6, siguí pa sinku réplika ku a keda sintí na míles di kilometer di distansia. E temblor a tuma lugá djis promé ku mei anochi i a keda sintí te na Jalalabad, ku ta keda na 27 km di distansia.
E temblor tabata relativamente superfisial, ku un profundidat di ocho kilometer, loke ta splika e kantidat haltu di morto i dañonan den e provinsianan di Nangarhar, Kunar i Laghman. Den e distrito di Nurgal, un dje zonanan mas afektá dje provinsia Kunar, e abitantenan tabata buska sobrebibientenan bou di loke a sobra di edifisionan.
“Den kada kas tabatin por lo ménos un morto òf un persona heridá”, segun Gul Mhamad Rasalu, un abitante dje pueblo den seru di Wadir. Mas ku 1.2 mion persona probablemente a sinti e sakudimentu hopi fuerte.
“Murayanan a basha bou riba kantidat di hende i algun di nan a muri”, segun Zafar Khan Gojas, relatando e teror den un edifisio kaminda e tabata na e momento ei.
Mohammed Jawad (20), a bisa di a kore sali for di su kas ora ku el a sinti e temblor, pa djis despues mira kon su kas a basha den otro.
E talibannan, ku a regresá na poder den Afganistan den 2021, a atvertí ku e balanse di víktimanan lo oumentá segun ta sigui avansá den e búskeda den zonanan mas leu.
Den aña 2023 tambe Afganistan a biba un teremoto hopi fuerte, ku a laga 1.500 morto i 63.000 kas destruí.
