WILLEMSTAD.- Den fin di siman último a klousurá temporada 2019 di tènis hubenil ku e torneo Curaçao Junior Masters. E kuater tenistanan mihó rankiá den e kategorianan di edat Junior U10, U12, U14 i U18 a hunga pa título máksimo riba kanchanan di RCC na Mon Repos.
Den kategoria U-10 femenino e título a bai pa Candice Curie kende den final a gana di Keziah Fluonia. Serka e muchanan hòmber dje kategoria U-10, Luciano Jansen a derotá Jevahn Josephina 3-5, 4-2, 4-2.
Serka e damitanan U-12, Gianna Martis den un partido di hopi tenshon a vense Candice Curie 4-2, 3-5, 4-2. Den kategoria maskulino U-12, Zahyd Josephia a kue e título ku sètnan di 5-3, 2-4, 4-2 riba Ricardo Winkel.
Den U-14 tabata Sara Loaiza i José Carlos Andrade kendenan a bai ku e título, ganando di Sibella Mendez i Aldair Correia Marques, respektivamente.
Por último, den kategoria U-18 femenino e título a keda ganá pa Sarinah Maduro ku triunfo di 7-6, 7-6 riba Zima Gomez Osorio. Serka e kabayeronan, Quintan van Wijk tabata skèrpi i a gana 6-2 i 6-4 di Darren Martis.
Despues dje finalnan, a klousurá e temporada di tènis di forma ofisial ku entrega di premio festivo i un ‘treat’ na e tenistanan.
E kampionnan
E siguiente tenistanan a resultá kampion 2019 den nan respektivo kategoria:
*U10 Candice Curie i Brandon Bridgewater;
*U12 Gianna Martis i Ricardo Winkel;
*U14 Sara Loaiza i José Carlos Andrade;
*U18 Sarinah Maduro i Quintan van Wijk.
Seguidamente a hasi entrega di premio na e coachnan ku mas tantu hungadó ‘rookie’ riba ranking, kendenan ta Jason Engelhardt i Razul Winklaar miéntras ku a hasi homenahe na e hungadónan ranking di aña, kendenan ta Candice Curie i Quintan van Wijk.
…Ganadónan dje kompetensia di ranking hubenil…
