Chèns di desaroyo di ola tropikal abou 10%
WILLEMSTAD. – Tin un disturbio ku 10% probabilidat den 7 dia di formashon pa bira un siklon. E probabilidat akí ta hopi abou. E disturbio akí ta situá riba Atlántiko Tropikal Sentral (AL94) i datonan resien derivá for di satelitnan ta indiká ku un área débil di preshon abou asosiá ku un ola tropikal a bira ménos organisá. Sinembargo, e ola tropikal ta sigui produsí áwaseru desorganisá kompañá ku welek i bos.
Na e momentunan aki e kondishonnan ambiental no ta faborabel pa un desaroyo durante e próksimo dianan. E ola tropikal ta move wèst na alrededor di 15 mia pa ora.
E probabilidat pa forma den e próksimo 48 oranan ta abou ku 10% meskos ku e probabilidat den e próksimo 7 dianan tambe e probabilidat ta abou na 10%.
Pa loke ta trata tempu lokal, t’asina ku e situashon general, ta un kondishonnan di wer aktual lo sigui limitá e desaroyo di formashon di nubia signifikante riba nos region. Komo resultado, wer pre-dominantemente seku lo sigui prevalesé riba nos isla. Sinembargo, ta antisipá un oumento di humedat den e kapanan mas abou di airu den kurso di awe mainta. Esaki lo kousa temporalmente un tiki mas nubia pero e chèns pa áwaseru lo keda práktikamente chikitu.
Temperatura máksimo lo alkansá 32ºC i temperatura mínimo 26ºC.
Bientu por lo general ost i moderá; forsa 3 te 4 (12 te 30 km/ora, 7 te 16 nudo). De bes en kuando basta fuerte den ráfaga; forsa 5 (31 te 39 km/ora, 17 te 21 nudo).
Kondishon di laman ta moderá riba laman habri, ku altura di olanan entre 1 i 1.5 meter (3 i 5 pia).
No tin nada di sistemanan signifikante di wer tropikal, tampoko fenómeno spesial.
Perspektiva te djárason atardi ta parsialmente nublá i lo tin algun aktividat di áwaseru durante transkurso di dia.
