WASHINGTON, AP.- E direktor di Fondo Monetario Internashonal a atvertí ku ekonomia mundial mas saludabel den añanan ta bou di menasa pa un oumento di nivelnan di debe, merkadonan vulnerabel finansieramente i un kresiente disputa komersial entre e dos ekonomianan mas grandi di mundu.
Un guera komersial entre Merka i China “lo no ta algu ku lo afektá únikamente e dos paisnan debí ku mundu ta interkonektá. E lo afektá e ekonomia global”, asina Christine Lagarde a bisa durante di un rueda di prensa pa inougurá e reunionnan di e organismo di 189 nashon i di banko Mundial.
Pa awor aki IMF ta premirá ku ekonomia global lo krese ku 3,9%, e ritmo mas rápido for di 2011. Pero Lagarde a atvertí ku nan a mira mas nubia akumulando den horizonte.
El a sita e tenshonnan komersial i e debenan global kresiente ku a alkansá un sifra rekòr di 165 bion di dòler i a destaká ku e debenan gubernamental di ekonomianan mas avansá ta na nan nivel mas haltu for di e di dos guera mundial.
E tres dianan di diálogo tambe a inkluí kombersashonnan entre e grupo di e prinsipal 20 ekonomianan, ku ta representá mas di 80% di e produkshon ekonómiko global.
