Tep di Fl.10.000 pa informashon riba kaso asesinato na Fuik

WILLEMSTAD.- Dia 17 di sèptèmber di aña pasá, Kòrsou a registrá e di 3 kaso di asesinato di aña 2017 despues ku sra. Cecilia Alexander (QEPD) di 81 aña di edat a keda kruelmente asesiná den su kas na Kaya Seru Machu na Fuik.
For di dia ku e kaso lamentabel aki a tuma lugá, a kuminsá ku investigashonnan profundo inkluso a hasi un rekonstrukshon di e kaso.
Ayera, polis a saka un video kaminda por skucha e víktima ku su último rosea kon el a yama sentral di polis 17 di sèptèmber 5.05’or di mainta indikando ku lo tin un òf mas persona tirando basta piedra riba su kas.
No a dura mashá ku e sospechoso(nan) a kibra bentana di kas i drenta parti paden kaminda e víktima tabata ku sentral di polis na telefòn ainda.
E víktima a indiká ku ta trata di un sospechoso haltu, postura delegá, pèchi riba kabes i ku arma den su mas.

Despues di esei no a tende nada mas via di e telefòn.
Tabata parti mainta ku outoridatnan a topa ku e víktima su kurpa ya sin bida den su kas i ku vários perforashon di bala.
E kaso aki a hala atenshon i spesialmente kaminda e víktima a pidi asistensia polisial, polisnan a bai, a pasa dilanti dje kas, pero no a baha bai na e kas pa asistí e dama víktima. Nan a mèldu na sentral di no ta mira nada. E aktuashon dje dos sentralista di polis ku a atendé e yamada di e dama, no tabata korekto i esaki a kondusí na retiro inmediato dje dos sentralistanan.
Pa por yega na e sospechoso(nan) i solushoná e kaso aki Ministerio Públiko a pone e montante di Fl.10.000 disponibel pa esun ku por tin e tep di oro.
Esnan ku tin kualke informashon pa chikí ku e por ta, por tuma kontakto na numbernan di telefòn: 866-6222, 917 òf e liña anónimo 108.
Por wak e video ofisial di polis riba e página di facebook di EXTRA: https://www.facebook.com/extracuracao/.

SHARE

LEAVE A REPLY