WILLEMSTAD.- Djadumingu último e organisashon di TEQA ku ta pará pa The Excellence Quality Art tabatin un trep den konvoi kaminda ku nan a pasa diferente sitio históriko di Kòrsou i bai kulminá na playa kenepa. Kaminda akinan e grupo a hasi diferente weganan interaktivo ku e meta pa sosialisá un ku otro teniendo kuenta ku tur e reglanan stipulá pa COVID-19. Meta di e aktividat aki tabata pa ban interkambiá nos ku nos grandinan. Durante ku tabata pasando na e sitionan históriko aki, e grupo di hóbennan di The Excellence Quality Art tabata kanta kantikanan di mucha pa asina bai bèk un ratu den infansia di e grandinan ku a kompañá nan.

E dia a kuminsá for di 05:30 di mainta ku un tremendo desayuno ku e hóbennan di The Excellence Quality Art mes a prepará i mèrdia e grupo sosial di hóbennan aki mes a prepará un tremendo menú ala bufèt pa tur miembro, pero tambe pa tur e grandinan ku tambe nan a invitá huntu ku nan riba e dia aki en kuestion.

Tabatin tur gremio di edat presente na e aktividat aki for di e bebi te e edat di mas respetá ku tabata Mai Rosa Maduro di 91 aña ku tambe a bai huntu ku TEQA.  E tema di e dia aki tabata ” Konta mi mas pa mi sa”

I algun ratu promé ku e aktividat a terminá tabatin un presentashon di sorpresa di Doña Elia Isenia ku a bin kulminá e atardi ku un tremendo presentashon kultural.

 

Fabian Martina komo esun ku ta enkabesá e organisashon di The Excellence Quality Art tabata satisfecho sigur di mira kon un i tur presente tabata disfrutá i gosa di e dia ku e huntu ku su tim a organisá. I ta mira bèk riba un dia eksitoso i inolvidabel.

LAGA UN KOMENTARIO

Please enter your comment!
Please enter your name here