Daño material kousá pa e temblor ta inmenso. Na Vários parti di Birmania i Tailand edifisionan grandi a basha den otro.
NAIPYIDO, Birmania (AFP).- Un teremoto devastador di magnitut 7.7 a gòlpia Birmania i Tailand lagando por lo ménos 150 morto, un kantidat ku nan ta antisipá ku lo oumentá hopi lihé. Ademas di esei den un ratu di ora a registrá algun shen herido i desena di hende atrapá bou di edifisionan ku a basha den otro.
Episentro dje temblor a situá na 16 km for dje siudat di Sagaing, den Birmania, na un profundidat superfisial di 10 km, segun Servisio Geológiko di Merka (USGS).
E sakudimentu di tera, siguí algun minüt despues pa un repliká di magnitut 6.4, a kibra kamindanan, basha edifisionan abou i a okashoná dañonan enorme.
E nivel di daño material a obligá e hunta militar ku ta goberná e pais pa lansa un petishon no normal di yudansa internashonal i deklará estado di emergensia den seis region.
E hefe dje hunta militar, Min Aung Hlaing, a indiká ku 144 persona a muri i 732 a resultá heridá, pero a atvertí ku e kantidat di víktima probablemente lo oumentá.
“Lo mi ke invitá kualke pais, kualke organisashon òf kualke persona di Birmania pa bin yuda nos. Danki”, el a bisa den un diskurso na televishon.
Union Europeo, Fransia i India a ekspresá nan disposishon pa manda apoyo i e presidente norteamerikano Donald Trump tambe a primintí na yuda Birmania.
Organisashon Mundial di Salú a anunsiá di a aktivá su sistema di kasonan di emergensia i ku su sentro logístiko di Dubai a mobilisá pa prepará suministro pa heridonan.
E prinsipal kaminda ku ta uni Mandalay i Saging, e universidat i e muraya dje palasio real di Mandalay a basha bou i telekomunikashon a keda afektá.
E petishon no usual di yudansa di parti militarnan birmano ta un indikashon di e proporshon dje daño, den un pais kaminda e infrastruktura i sistema di salú ta debilitá pa motibu di kuater aña di guera sivil.
E hospital Naipyido a risibí algun shen víktima. “Nunka m’a mira algu asina’ki. Nos ta purbando pa manehá e situashon”, segun un dòkter a bisa.
Pa motibu dje kantidat di víktima, e hòspital a kuminsá atendé heridonan pafó dje edifisio. ”Esaki ta un zona di viktimanan den masa”, segun e dòkter a indiká.
Te na Tailandia
E sakudimentu ku forsa a keda sintí den parti nort di Tailand i tambe e kapital Bangkok,na algun 1.000 km for di e episentro.
Outoridatnan tailandes a deklará estado di emergensia den e kapital, kaminda un edifisio den konstrukshon di mas ku 30 piso a bin abou ku kantidat grandi di obrero den e edifisio.
Rápidamente a saka ocho restu morto, pero a keda entre 90 pa 110 obrero ku mester ta pegá den e ruinanan.
Nan a sinti e temblor na lugánan leu, manera na China, Camboya, India i Bangladesh.
Hendenan na kareda na momentu ku un edifisio den konstrukshon a bin abou durante dje temblor.
