Palestinonan heridá ta risibí tratamentu médiko drumí abou na suela den sala di e hospital Nasser den Khan Yunis, área parti zùit di Gaza. E kantidat di palestino morto a yega na 63.459, e gran mayoria ta sivilnan.
GAZA, Palestina (AFP).- “Nos tin miedu di bai drumi den oranan di anochi” segun Iman Rajab, abitante di Gaza, despues di un intenso bombardeo israelí ku djadumingu a laga 16 morto mas. E áwaseru di bombardeo den oranan di anochi a gòlpia vários zona di Gaza, inkluso Siudat di Gaza, den nort, kaminda ehérsito israelí ta prepará pa lansa un ofensiva na gran eskala pa kaba ku e movementu islamita Hamás.
“Nos ta resa na Dios pa e guera akí kaba, nos ta kansá di ta move kada bes pa otro sitio, nos tin miedu i hamber”, segun Rajab den deklarashon na AF. Den oranan trempan di ayera mainta un kolumna di huma a tapa Siudat di Gaza, e siudat mas grandi den e teritorio palestino. Den e kas funerario di e hospital Al Chifa, famianan tabata yora morto di kantidat di víktima poné abou na suela.
E strook di Gaza ya pa kasi 23 luna ta esenario dje konflikto entre Israel i Hamas. Defensa Sivil djadumingu a duna un balansa di 16 morto den e último operashonnan militar israelí, inkluyendo 10, hopi serka dje sentro di distribushon di yudansa.
Ehérsito israelí a bisa di ta investigando, pero a splika ku ta hopi difísil pa haña informashon sin e orario i e puntonan presis ku a keda denunsiá. Debí na e restrikshonnan imponé riba medionan di komunikashon den Gaza i e difikultatnan pa drenta e área, AFP no por a verifiká di forma independiente e balansa di Defensa Sivil.
Ta kalkulá ku Israel a mata den kareda di 63.459 persona den Gaza, e gran mayoria ta sivilnan ku no tin nada i aber ku e guera.
