WASHINGTON, USA (AFP).- Jim Jordan kende ta un aliado di èks-presidente Donald Trump, ayera pa di tres biaha den kuater dia no a logra pa keda eligí komo presidente di Kongreso di Merka, na momento ku Joe Biden ta pidi un oumento presupuestario pa Ukrania, Israel i e desafionan di migrashon legal.
Pa kasi tres siman kaba, e Kámara di Representantenan di Merka, ku supuestamente tin un dje kongresonan mas poderoso di mundu, no por a vota pa ningun proyekto di lei.
Durante e 17 dianan ku a transkurí for di despues ku Kevin McCarthy a keda destituí komo presidente dje Kámara di Representantenan, e 221 republikanonan no a logra yega na un akuerdo pa haña un susesor pa e puesto.
E konservadornan tin un mayoria den e kámara, pero nan ta dividí entre e ala duru i esnan moderá.
E super konservador Steve Scalise ya a pèrdè siman pasá i Jim Jordan, tambe dje ala duru dje partido i hopi yegá na Trump, a frakasá pa di tres biaha e siman aki.
Ademas, kada bes ku e bai votashon e ta pèrdè mas peso en bes di gana esei: 20 republikano a vota kontra di Jordan djamars, 22 djárason i ayera 25.
“Nos ta mal pará na e momento”, McCarthy a rekonosé despues dje último votashon. No ta bon kla si Jordan, di 59 aña, lo presentá pa di kuater bes.
Algun ta sigurá di lo no vota p’e ounke ku e sigui persistí. “Ku tur rèspèt, ta bon kla ku Jordan no tin ni lo haña e votonan pa bira presidente di e kámara”, segun e kongresista Tom Kean a bisa den un komunikado.
