Presidente kubano Miguel Diaz-Canel de un diskurso nashonal ayera na televishon, ku band’i dje un imágen di defuntu eks-lider kubano Fidel Castro.
LA HABANA, Cuba (AFP).- Dos barku di guera di México, ku alrededor di 1.000 tòn di alimento, remedi i materialnan médiko ayera a yega Cuba pa e di tres kargamentu den un luna di parti di México pa e isla ku ta de un krísis ekonómiko grave. Un krísis ku a bira aun mas serio debí na e preshon di partí di Washington.
“Gobièrnu dje iskierdista Claudia Sheinbaum den un luna di tempu a manda mas ku 3.000 ton di produktonan, prinsipalmente alimento”, segun e planta di televishon nashonal. “Danki México, un biaha mas”, asina e minister kubano di Komersio Interior, Betsy Diaz, a bisa durante e seremonia pa risibí e bapornan Papaloapan i Huasteco den haf di La Habana.
Diaz a bisa mas aleu ku e karga a inkluí lechi i bonchi, pero tambe “suministro médiko i algun otro produkto ku ta donashon dje pueblo mehikano”.
Cuba, ku 9.6 mion habitante, ta den un fuerte krísis ekonómiko, ku a bira mas grave ku suspenshon di krudo for di Venezuela den luna di yanüari último.
Den un deklarashon na radio i televishon ayera, e presidente Miguel Diaz-Canel a elogiá e apoyo di Sheinbaum i a bisa ku La Habana ta hibando kombersashon ku Washington.
