‘Tertulia ku nos Reinan di Tumba’

... Ocho, 1 Reina ku 7 Rei, total 24 korona ...

WILLEMSTAD.-  Djadumingu awor ta fecha pa Inskripshon di Festival di Tumba 2020. Bo korant faborito, EXTRA, den su afan pa sigui promové Kultura di Kòrsou i den e kaso partikular aki Festival di Tumba di Kòrsou ta presentá: ‘Tertulia ku nos Reinan di Tumba’.
Na okashon di selebrashon di 50 edishon di Festival di Tumba korant EXTRA a produsí un ‘Tertulia di Tumba’ ku e Reina i Reinan di Festival di Tumba ku a gana e korona na tres okashon. E programa aki lo pasa promé ku e transmishon di Inskripshon di Tumba tuma lugá.
REINAN
Nos invitadonan pa e tertulia tabata Doña Elia Isenia, ganadó di Festival di Tumba na 1991, 2002 i 2010; Sidney Isidora ‘Mr Saab’: ganadó na 1975, 1978 i 1994; Farley Lourens, ganadó di tres korona konsekutivo na 2003, 2004 i 2005. Ismael ‘Ike’ Jesurun: ganadó na 1995, 1996 i 2014. Urvin ‘Luwi’ Jano: ganadó na 1993, 1998 i 2018. Hendrik de Windt; ganadó na 2000, 2008 i 2011. Amos Balentin: ganadó na 2012, 2015 i 2017 i Rubertico ‘Tico’ Balentien kende a gana e festival na 2007, 2009 i 2016.
Nos Tata di Tumba, Anselmus ‘Boy’ Dap, ganadó di e festival na 10 okashon no por tabata presente pa e grabashon i diskulpa su mes pa esaki. A rekordá tambe Harry Zimmerman, di felis memoria, kende a gana e festival na 1980, 1990 i 1999.
TERTULIA
Tico Balentien tabata e anfitrion dje mèrdia kaminda e invitadonan a topa otro na Hacienda Olivia na Skèrpènè i a kompartí ku otro anektoda, momentunan inolvidabel, konta di nan eksperensia i momentunan serio i chistoso ku nan a pasa aden durante di nan añanan di partisipashon na Festival di Tumba.
Algu mas ku 1 ora di kombersashon, harimentu ku lo laga bu sera konosí mas djaserka ku kada un dje Reinan.
TRANSMISHON
Transmishon di ‘Tertulia ku nos Reinan di Tumba’ lo tuma lugá djadumingu awor pa 12 or di mèrdia via di e plataformanan digital di EXTRA ku ta e página di facebook: ExtraCuracao i kanal di YouTube: Extra Curaçao.
Ta pendiente tambe pa hasi uso di mas plataforma pa transmití e programa kombiná ku Inskripshon di Festival di Tumba. Manera esakinan ta konosí nos lo kompartí esaki ku nos lesadó i siguidónan.

SHARE

LEAVE A REPLY