KRALENDIJK — Entrante djamars tur pasahero for di eksterior mester por mustra un prueba di tèst negativo na Schiphol. Esaki primeramente pa esnan ku ta bini for di áreanan di rísiko. Banda di esaki nan mester yena un `Negative Test Declaration`. Sin esaki no ta permití pa drenta Hulanda.
Pa medio di esaki gobièrnu hulandes ke trata na baha e gran kantidat di kontagio ku tin den e pais. Manera ya anunsiá Hulanda a bai den `lockdown` total entrante wikènt tras di lomba.
Hulandesnan i siudadanonan den Union Oropeo , no ta obligá di hasi e tèst. Esaki sin importá di unda nan ta bini. Meskos ta konta tambe pa hulandesnan ku ta biba den Reino Karibense. Nan por biaha sin ningun problema pa Hulanda. Visevèrsa sí ta pidi un resultado negativo di un PCR tèst.
