Thallysa i Nadienne; hóbennan den farándula

Thallysa Jano (18) a partisipá e aña aki na festival di tumba ku “Den mi Sanger” miéntras ku Nadienne Martina (21) a kompañé riba piano ku e banda Excellence. Dos dama prometedor i ku nos lo wak bèk riba tarima, probablemente asta internashonalmente. E aña aki a partisipá 11 hende muhé na festival di tumba di kual 5 a klasifiká. 2018 tabatin e kantidat mas haltu di hende muhé ku a partisipá na festival di tumba, kual tabata 13 i di e kantidat ei 7 a klasifiká. Esei ta e kantidat mas haltu den último 5 aña.

 

Thallysa i Nadienne di Excellence…

Nos a kombersá un ratu ameno ku Thallysa i Nadienne promé ku nan presentashon na gran marcha di karnaval mañan djadumingu. I ku e dos damanan aki nos ta klousurá e temporada di karnaval. Thallysa a partisipá e aña aki komo su di dos aña partisipando na tumba. E promé aña tabata na 2019 i ya e por bisa ku el a eksperensiá hopi, el a siña hopi i awor el a drenta e mundu aki di ser un karnavalista. E ta bai, e ta progresá manera Thallysa a bisa. Den tumba di mucha nunka el a partisipá. Thallysa su tata ta eks rei di tumba Urvin Jano. Thallysa ta bisa ku kisas ta su tata i su famia ta esnan ku a impulsé pa partisipá na tumba. Di su mes tambe e ta gusta karnaval i gusta e ritmo di tumba. E ta un ritmo dushi i ta di nos e ta. Esei a trese e gana serka dje pa e hasié algu di dje.

Loke a hala nos atenshon di e presentashon di Thallysa riba tarima tabata e siguransa ku el a presentá su tumba kuné. Thallysa a bisa Djasabra ku e siguransa ei pe semper ta nesesario. Ora e subi esenario e tin di mustra kiko e tin aden i ta hasi su bèst pa demostrá esei.

 

10 aña riba piano….

Nadienne tin 10 aña riba su piano. E ta biba esaki inmensamente. Ora e mira su piano un alegria inmenso ta drenta su sanger. E ta forma parti di e banda Excellence i segun Nadienne e no kier a toka piano mes. Pero danki na su mama ku a enkurash’é i su ruman pa bai e proyekto ku Feco Gomez a inisiá na instituto pa formashon musikal, duna lès na skol. E i su ruman a bai i nan a djòin Junior All Stars Orkestra i até aki gosando te ku e ta pianista di e banda Excellence. Esaki ta e di 3 aña ku Nadienne ta partisipá na tumba. I den karnaval Nadienne a bisa ku ta su di dos bia ku e ta toka den marcha grandi i chikí di karnaval.

Siña otronan tambe piano….

El a splika Djasabra ku pa loke ta muzik den futuro e ta hopi di focus pa e por siña otronan loke e tambe a siña. E ke siña hóben ku no ta pasobra bo ta mucha muhé bo no por toka. Bo mester tin kurashi, purba te ora bo por hasié bon. No laga niun hende bisa pasobra bo ta mucha chikí bo no por. E ke demostrá e hóbennan i tambe siña nan meskos ku el a siña pa ta un pianista manera e ta awor aki.

 

“Mi trabou i mi hòbi”….

Pa Nadienne toka piano ta su trabou, e ta parti di su hòbi i ta relah’é.  E ta pianista di Excellence i e ta duna lès, pues e ta su trabou tambe. I pa esun ku ke bai lès di piano Nadienne a bisa ku si bo ke siña bo ta siñ’é kon ku bai bin. Bo tin di djis hasié, e interes mester tei. E ta konsehá hendenan pa purb’é. Nadienne tambe ta bin di un famia ku ta gusta músika, su tata i tawela sigur.

Muzik den su sanger….

Thallysa tin e músika te profundo den su sanger, i esaki no di parti su tata so, pero su wela tambe ta toka piano, duna lès di kuarta i lès di blòk flùit. Su opa ta kompositor, tokadó di piano i tabatin su mes banda ántes, e tin tantanan kantante. E ta kore den su famia di parti mama i tata. I manera su tumba a bisa, e ta den su sanger.

 

Toka ta otro fo’i kanta…

Thallysa tabata bai lès di kanta i e tambe tabata forma parti di Junior All Star Orkestra. El a bai lès di kanta den pasado. I pa esun ku ke siña kanta tin hopi kos pa siña den kantamentu entre nan si bo gust’é bo por bai pe pero no tur bia bo tin e talento. Pero esun ku tin gana i ke hasié, por siña hasié. Esun ku mira adelanto por dal bai. I di práktika segun Thallysa bo ta bira mas mihó. Toka ta otro for di kanta. Tin hende e ta kere ku kanta ta algu fásil, pero segun Thallysa e tin su kosnan kuné. Tokamentu tambe tin su kosnan kuné. Tur kos ku tin di aber ku músika tin su kosnan kuné. E por mustra fásil pero tur kos tin nan kos kuné.

Maestro i kantante….

Thallysa ta forma parti aktualmente di e banda Excellence i e tin hopi espektativa pa ku e banda i ta spera pa kosnan bira muchu mas mihó i ku nan lo haña hopi toká pa hende wak ki talento nan komo hóben tambe tin. I pa su mes el a bisa ku e ta studiando pa maestro di skol awor aki pero e ke sigui ku kanto den banda pa e por sigui bira mas mihó. E ta algu ku e ta gusta i p’esei e ke sigui kuné wak kon leu e ta yega.

 

Hopi aporte…..

Pa loke ta tumba, su di dos bia den e festival, Thallysa a bisa ku el a haña hopi tep, artistanan konosí ku tambe a duna nan aporte pa bisé kiko pa e tene kuenta kuné. Hopi hende ta bisa ku ora bo subi esenario i mira e públiko e ta hasi algu ku bo, pero pa e mes personalmente e no a sinti e vibrashon ei, te el a bai su di dos aña. Tabata un dushi sentimentu i e ta gusta riba e esenario. Thallysa a sintié kompletamente na kas, siendo riba e esenario ei. El a subi esenario diferente bia i ni esun di tumba ku ta mas grandi no a hasié nada.

 

Subi esenario ku nèrvio…..

Pa Nadienne, e si tin e nerviosismo tòp riba esenario, pero ora e subi i kuminsá toka, e ta drenta den e goso, i komo e ta gusta kiko e ta hasiendo e ta domin’é. “Ora mi kuminsá toka mi ta sinti mi masha dushi mes”. I ku e banda Excellence ta kos bon so por spera di Nadienne. E ta spera ku nan por demostrá ku nan por, nan tin eksperensia i pone nan nòmber eiriba. Nadienne a yega di toka kanto pa Kòrsou tambe.

 

Por spera hopi di Thallysa…

Pa Thallysa, siendo hopi aña huntu ku Nadienne den bandanan anterior, el a bisa di a toka basta kaminda i por spera ku por mir’é mas kaminda i sigur ku e banda Excellence. E lo duna di su parti pa por skucha mas di dje.

 

 

SHARE

LEAVE A REPLY