WILLEMSTAD .- Djabièrnè tardi tabatin e preludio p’e apertura mas lat e aña aki di The Pyrmont Curaçao Beach Resort kaminda Pietermaai i Pèn ta topa. Den un ambiente festivo na e espasio di resepshon nobis-nobis di e resort ‘premium all-inclusive – adult only’ a enfatisá den e diskursonan kon e proyekto aki a duna un parti di historia di Kòrsou un futuro nobo.
The Pyrmont Resort ta ekstendé di loke tabata Cerro Bonito te na e anterior Kas di Pueblo (promé ku esei Kas Pyrmont). Na Cerro Bonito lo bin un restorant ku un kushina klásiko i den Kas di Pueblo ta bai tin un ‘full-service spa’; ámbos lo ta aksesibel pa hende di pafó. E estilo neoklásiko di e edifisionan monumental aki a sirbi komo inspirashon pa loke na diferente forma ku por bai topa bèk den e hotèl. Di e forma ei ta apliká e patrimonio riku di nos isla na kaminda pa un futuro nobo.
E kompania doño The Pen Resort BV a logra un konstrukshon ku dentro di poko por konta ku 305 kamber, entre nan 36 “suite” presioso. Ademas lo tin 6 restorant i bar, un “ballroom”, un sentro di “fitness” i un sentro di sambuyamentu i deporte akuátiko. E wéspetnan por bai gosa tambe na un di e dos pisinanan òf na e playa i kana keiru riba un koredor largu. A inkluí tambe diferente inovashon; entre nan, pa mas durabilidat, lo hasi uso di instalashonnan di awa di laman konforme e prosedimentu di OWAC pa fria e espasionan parti paden. Segun kálkulo, ku esei lo ekonomisá alrededor di 75% pa loke ta e gastunan di energia.
The Pyrmont ta un pèrla nobo pa e “Autograph Collection”, pertenesiendo na Marriott, e kadena internashonal di hotèl. Djabièrnè konsekutivamente a hiba palabra e doño Bastiaan Guis, Gerente General Rob de Bekker di The Pyrmont, Ricardo Echeverri (visepresidente di Marriott pa e área di Karibe i Amérika Latina) i minister Charles Cooper di Finansa i di VVRP.
Pa for di salida ekspresá e konekshon ku bienestar di komunidat di Kòrsou, GM De Bekker a entregá un chèk di 15 mil florin na e Clean-Up Curaçao Foundation, ku e luna aki ta bolbe organisá e tradishonal akshon masal di limpiesa na nos isla (wak potrèt).
Na final di e seremonia i den presensia di e ministernan Cooper i Roderick Middelhof (MEO/Turismo), e mama Gerda Guis i su yu muhé Jacqueline Guis simbólikamente a kòrta e sinta antisipando asina ku pronto lo start e operashonnan di e hotèl.
E proyekto aki ta parse un bon kombinashon di historia, turismo i inovashon pa Kòrsou. Mi ta gusta especialmente e enfoke riba durabilidat; meskos ku den block blast, un bon resultado ta dependé di kon tur e partinan ta kombiná. E restorantnan, spa i playa seguramente lo hasi The Pyrmont un lugá interesante pa bishitá.