Turismo su efektonan kultural, ambiental i sosial
WILLEMSTAD – Ayera atardi den Aula na Universidat di Kòrsou, Robertico “Tico’ Croes a lansa su buki ‘A Journey to Happiness’. E fakultat di ‘Social Sciences and Economics’ tabata anfitrion di e okashon speshal aki.
Robertico Croes, un profesor na UCF su Rosen College of Hospitality Managemnt, ta un eksperto renombrá den ekonomia i maneho di turismo, ku un enfoke riba avanse di desaroyo humano den regionnan ku situashonnan ekonómikamente limitá. E ta sirbi komo editor di ‘Rosen Research Review’ i ta outor di vários obra influyente.
‘A Journey to Happiness’ ta ofresé un eksplorashon ku ta pone pensa riba e impakto profundo di turismo riba tantu e biaheronan komo e komunidatnan ku nan ta bishitá. E buki ta kuminsa na Guayaquil, Ecuador, kaminda un inisiativa di turismo lokal ta lanta e investigashon mas profundo di e outor di kon turismo ta forma felisidat i bienestar. Loke ta kuminsá komo un investigashon di benefisio nan ekonómiko di turismo ta ekspandé lihé den un eksaminashon multidimenshonal di su efektonan kultural, ambiental i sosial.
Pa medio di kontamentu di historia bibu i investigashon riguroso, e outor ta hiba lektornan riba un trayekto, for di e kayanan vibrante di Latino Amérika te na e kostanan sereno di Aruba, deskubriendo e kompleksidat nan di influensia di turismo. E narativo ta trata e potensial pa turismo impulsá kresementu ekonómiko i kon e por perpetuá desigualdat i tenshon ambiental. Ankrá den e prinsipionan di desaroyo sostenibel i desaroyo ekonómiko, e buki ta defendé un aserkamentu mas balansá pa turismo, unu ku ta pone bienestar humano den sentro di polítika i práktika.
Mesklando eksperensianan personal ku bista akadémiko, ‘A Journey to Happiness’ ta reta modelonan di turismo konvenshonal i ta boga pa reevaluá e berdadero propósito. E buki aki ta un buki ku mester keda lesa pa tur hende ku ta interesá den turismo, sostenibilidat i e búskeda di felisidat. E ta ofresé un vishon fresku di kon biahe por benefisiá tantu e bishitantenan i e komunidatnan ku nan ta topa. ‘A Journey to Happiness’ ta optenibel for di awe na entre otro Mensings.
