WASHINGTON, MERKA, AFP.- TikTok a pèrdè un bataya na Washington i su prohibishon na Merka ta parse di ta inevitabel, un dia despues di un interogashon di su direktor ehekutivo di parti di legisladornan di Washington di vários divishon polítiko.
Pero e atministrashon di Biden lo mester move kuidadosamente pa ninga 150 mion hóben merikano akseso na nan plataforma faborito ku vínkulo ku China, spesialmente despues ku un korte merikano a anulá un esfuerso anterior di èks presidente Donald Trump.
E direktor ehekutivo di TikTok, Shou Zi Chew, mester a kontesta un avalancha di pregunta di legisladornan merikano ku a bisa bon kla ku e aplikashon di mas popular pa kompartí chiste i rutinanan di baile ta un menasa pa e seguridat nashonal di Merka, i tambe un peliger pa salú mental di su usuarionan.
Ku republikanonan i demókratanan den su kontra den Kongreso, Chew ta enfrentá e ultimatum di Kas Blanku ku TikTok mester kibra su relashon ku ByteDance, su propietarionan ku sede na China, òf keda prohibí na Merka.