NEW YORK (AFP).- Un tribunal di apelashon di Merka a rechasá e demanda presentá pa e plataforma TikTok kuestionando un lei ku ta eksigí pa e separá for di e kompania mama chines, ByteDence, òf kore riesgo di prohibishon pa operá riba teritorio merikano.
E lei, promové pa e presidente saliente Joe Biden den luna di aprel, lo impedí ku TikTok pa figurá riba e diferente páginanan i wèpsait na Merka si e no kumpli ku loke a keda stipulá.
Tres wes ayera a rechasá e prinsipal argumentonan diTikTok, den sentido ku e preokupashonnan di seguridat di Merka relashoná ku el ei en kuestion ta puro spekulashon.
Tambe korte a rechasá ku alternativanan ménos drástiko ku un benta di parti di ByteDance lo por resolvé e problemanan plantiá pa gobièrnu di Merka.
Mas aleu a rechasá e argumento presentá pa TikTok di ku e lei en realidat ta trata di sensurá kontenidonan enbes di garantisá seguridat nashonal.
Ta probabel ku e kaso awor lo bai Supreme Court di Merka.
E potensial di prohibishon lo por hasi e relashonnan tenso entre Merka i China nèt awor ku e presidente elekto, e magnate republikano Donald Trump, ta presentá pa drenta White House dia 20 di yanüari.
Gobièrnu di Merka ta di opinion ku e plataforma pa kompartí vidonan koòrtiku, hopi popular entre nobenanan rònt mundu lo permití gobièrnu chines pa rekompilá datonan privá i spioná e usadónan. Tambe ta bisa ku TikTok ta un sistema pa plama propaganda di parti di gobièrnu di China.
