Un Man pa Wèrfano
“Tehillah Praise and Worship Ministries,” ku na kabes Ilonka Amorsingh ta hasiendo trabounan balioso den nos komunidat. Un di nan ku a hala nos atenshon ta e ministerio Un Man pa Wèrfano ku Ilonka pa algun aña kaba ta trahando kuné. I nos a papia k Ilonka i tambe e hóben Rowan St Jacoba ku tin un historia ku sigur lo inspirá hopi hende. E meta di e diálogo aki ta pa inspirá i duna esnan ku ta pasa den situashonnan difísil un speransa, i tambe pa mustra ku tin organisashon i instansianan ku ta duna guia i empoderashon pa por sigui pa dilanti. E organisashon “Tehillah Praise and Worship Ministries” tin diferente proyekto, kual un di nan ta dediká na wèrfano. Tantu Ilonka komo Rowan tin eksperensia personal ku e tema. Ilonka a pèrdè su tata na un edat di 10 aña. Rowan tambe ta un wèrfano di parti di su mama, ku a fayesé ora e tabata un mucha di 10 aña. Nan ta kompartí nan historia i mustra kon nan a haña forsa pa sigui lucha i sirbi komo inspirashon pa otro.
Funshon di e ministerio
Ilonka ta kompartí ku “Tehillah Praise and Worship Ministries” ta bai kumpli 24 aña ku nan ta brinda servisio. For di chikitu, Ilonka ta forma parti di iglesia. Promé ku el a sintí e bendishon pa hasi e trabou aki, Ilonka a indiká ku ya e tabata sa den su kurason ku esaki ta su mishon. “Tehillah Praise and Worship Ministries” a kuminsá simplemente komo un salmista. Ilonka tabata skibí kansionnan inspirá pa Spiritu Santu i tabata graba i bende CD-nan ku e kanta. Esaki a generá fondo pa e por hasi proyektonan pa mucha i hóben. Segun tempu ta pasa, el a keda invitá vários bia pa hiba palabra i inspirá hende. Asina, e ministerio a sigui krese. Ilonka ta menshoná ku e ministerio a pasa den hopi kos. Promé ku e por a yuda otronan, e mester a prepará su mes mentalmente i spiritualmente. E ministerio ta konsistí di vários parti. “Tehillah Praise and Worship Ministries” ta e organisashon mama. Bou di e organisashon ta kai diferente ministerio, manera esun dediká na wèrfano, e parti di grabashon i saka kansionnan nobo, i e programa ‘Lanta Ariba’. Tur e partinan aki ta traha huntu pa logra e mesun mishon i propósito. Ilonka ta kompartí su historia personal komo un wèrfano. El a pèrdè su tata na edat di 10 aña i su mama na edat di 24 aña. Ora su tata a fayesé, e tabata pasa pa un periodo hopi difísil. Ilonka ta indiká ku su tata tabata su pilar: “Mi tabata wak riba dje i pensa, ‘Wauw, mi ke ta manera mi tata.’ Naturalmente, komo un mucha muhé, mi no por ta eksaktamente manera mi tata. E pèrdida tabata algu hopi grandi i drástiko pa mi bida. Un yu muhé hopi biaha ta hopi pega na su tata.” E ta bisa: “Mi ta kòrda ora mi tata tabata hospitalisá na Advent, ami i mi ruman Johnny tabata para na bentana ku deseo pa bai serka dje, pero nan no tabata laga nos drenta. Mi tata tabata tin ‘de Hel,’ i ora nan a indiká ku el a muri, e tabata sumamente difísil. Nos no tabata tin e oportunidat pa ta na su banda”. E momento aki a dal Ilonka fuerte, i e ta bisa ku el a kai den depreshon i, eventualmente, den situashonnan di desesperashon ku intenshon di suisidio. Despues su mama a fayesé, esaki tabata agregá mas doló i preshon. E tabata sinti ku bida no tin sentido mas. Ilonka ta kontá ku den e momentu mas skur, esakinan tabata esun ku a pusha e mas serka di Dios. E ta bisa: “Tur esakinan a yuda mi pa tuma e desishon pa yudá otronan. Awor aki mi ta sinti mi liberá di e doló I e lucha di mi pasado, kual a sosodé ora mi tabata tin 39 aña. Mi ta gradisí pa tur loke mi a pasa, paso nan a formá e persona ku mi ta awe”. E ministerio ta traha pa inspirá i yudá esnan ku ta kana den situashonnan similar, duna nan speransa i guia pa un bida nobo.
Eksperensia den práktika
Ilonka ta sigui splika ku e eksperensia di bida awor e ta pone den práktika. E ta splika ku e meta tras di e proyekto ta pa yuda e wèrfanonan ku a pèrdè un mama òf tata pa nan por pasa over di e doló i sigui pa dilanti. “E ta pa nan por krese i bira e persona ku Dios originalmente a planta nan komo un simia den nan mama”. Ilonka ta sigui: “Awor mi por bisa ku mi ta un hende hopi sigur di mi mes, sin importá kiko mi a pasa aden. Mi ta un persona ku sa ken mi ta den Kristu. Mi ta konfia den mi propósito i sa klaramente ki direkshon mi ke bai. Mi tin un vishon i un mishon ku mi tin ku kumpli kuné”.
Grupo di wèrfano ta grandi
“Sí, e grupo ta grandi,” Ilonka ta respondé. “Den e sentido ku e ministerio ta eksistí pa hopi aña kaba, durante e añanan ku mi a guia i ainda mi ta guiando, mi a mira hopi mucha i hóben pasa na mi man. Tin hóbennan ku nan tin nan mayornan, pero nan no ta risibí amor òf atenshon. Mi ta yuda nan ku esakinan tambe, mi ta duna nan amor di un mama, pa yunan ku ami mes no a haña”. Ilonka ta kontá ku apesar di e esfuerso, “nos no por yuda tur hende,” pero nos ta purba. E ta agregá un ehèmpel personal: “Manera awor aki, mi mes tin un tarea ku a surgi den un situashon hopi difísil. Mi tabata presente ora un aksidente a sosodé, i Señor a permití ku mi tabata einan. Esakinan mester di yudansa. Ta trata di 3 mucha. Tabata kruel pa wak esaki tuma lugá” Ilonka ta bisa: “Mi ta pidi Dios pordoná e persona ku a kousa e situashon, paso mi no ta husga. Nan tabatin dos yu i nan mes tin nan situashonnan. Mi a bai e entiero pa kuminsá konosé e famia. Asina, nos por lanta kontakto ku e muchanan i tuma nan den e fundashon”.
Rowan a pèrdè mama ku 10 aña
Rowan St. Jacoba ta un hóben ku tambe ta ministrando ku Ilonka. E tambe ta wèrfano ku 10 anja. E ta bisa: “Na 2011, un periodo nèt promé ku mi a hasi 11 aña, mi mama a fayesé. Despues di algun tempu mi a kuminsá sinti e efekto di e pèrdida”. E ta kontinuá: “Hopi biaha hende ta bisa ku ora bo ta chikitu, bo no ta realmente kapturá e idea ku un di bo mayornan a fayesé. Mi por komprondé esei den sierto sentido, pero pa mi, mi a sintí e efekto di bèrdat segun mi ta krese. Ora bo ta drenta bo ‘teen years,’ bo ta ripará ku mas bo falta algu. Pa mi, esei tabata e kariño i amor ku mi tabata anhelá di un mama, ku mi no tin mas”. Rowan ta agregá ku apesar di e apoyo ku su tanchi i welanan a dun’e, e bashí a keda: “Mi ta apresiá nan hopi, pero mi ta bisa semper ku no tin niun hende ku por remplasá e amor di un mama. Mi ta kòrda ora mi mama a fayesé, hende tabata bisa mi: ‘Dios su amor ta muchu mas grandi ku di bo mama.’ Pero ku mi 10 aña, mi tabata pensa riba kosnan práktiko, manera kon mi ta hasi mi eksámennan, kon mi ta kome òf bebe. Mi no tabata komprondé kon Dios su amor por ta mas grandi ku di mi mama” . Rowan ta kontá ku den su adolesensia, e doló a bira mas kla: “Mi ta kòrda hopi anochinan, mi tabata sintá den mi kamber, mi so, i mi tabata yora. Ora bo ta sali for di un dia fuerte ku hopi reto, bo ta lanta ku un deseo pa haña un brasa di konsuelo ku no tin, ku no por.”
E ta menshoná ku den su soledat, e tabata sinti Dios su presensia: “Semper ora mi tabata mi so, mi tabata sinti ku Dios tabata huntu ku mi. E tabata baha riba mi, i den mi yoramentu, mi tabata sinti un konfortabel ta rondoná mi.” Rowan ta menshoná versíkulo ku ta duna e forsa: ‘No tin nada, ni morto, ni bida, ni angel, ni un outoridat, ni nada ku a wòrdu kreá riba mundu ku por separá nos for di e amor di Dios”. E ta kontinuá: “Ora mi a komprondé ku no tin nada ku por separá nos for di e amor di Dios, mi a kuminsá aseptá e amor di Dios. Den e proseso di aseptá e amor di Dios por kompletu, mi a bin ripará ku e retonan di lanta sin un mayor ta krea insiguridat. Ora mi a komprondé ku Dios su amor ta sin límite, i ku bo no mester presta pa haña e, mi a bira mas fuerte”.Finalmente, Rowan ta bisa: “Awor mi tin un deseo grandi di yudá otronan. Mi ta ripará ku dor di mi eksperensia, mi a bira mas sensitivo na nesesidatnan di otro hende. Esaki ta permití mi di mira e nesesidatnan i yuda”.
Mas atenshon na nos wèrfanonan
Ilonka ta haña ku mester tin mas atenshon pa wèrfanonan na Kòrsou. “Sigur, sigur. Ora mi wak e lucha ku ami mes a pasa, hopi biaha mi tabata buska sosten i yudansa, pero mi no tabata haña e fásil. Mi a trahá hopi aña ku “Widows and Orphan Foundation”. E hende tabata yama mi I bisa mi: ‘Ilonka, a yegá tempu pa bo tuma e tarea ei over, paso aki na Kòrsou no tin hende ku ta mira e nesesidat, pero abo a eksperensia e kos aki. Bo tabata ku nos semper”. Ilonka ta agregá: “Porta un hende ku no a pasa den dje no por sinti ni komprondé e efekto. Hende ku no a haña nan mes den un situashon no sa kiko e kos ei ta nifiká. E ta mes kos ku un hende ku niun bes no a haña kanser i no por sa kiko un hende ku tin kanser ta sinti. Mi ta kere ku Dios mes a yama mi pa mi hasi e trabou aki, i ami ta tuma e hopi na serio”.
Loke ta hasi pa wèrfano
Ilonka ta enfatisá ku e parti di edukashon i formashon ta sumamente importante: “Nos por hasi tur tipo di evento sosial, pero ora e yu ei bai kas bèk òf kaminda ku e ta keda, e ta bai bèk den su frustrashon. Un ratu e ta kontentu, pero esaki no ta basta. E mester haña su identidat den Kristu.” Ilonka ta kontinuá: “Mi mes mester a haña mi identidat pa sa ken mi ta. Ora bo sa ken bo ta, e ora ei bo por kuminsá kana. Manera Rowan a splika, hopi wèrfano ta enfrentá problema ku nan identidat, i hopi bia nan ta sinti inferior. Ami tambe a pasa esaki. Mi tabata un hende ku for di chikí tabata presta hopi. Pero dikon? Paso mi tabata hasi kosnan solamente pa mi por konta; pa mi por sinti ku mi tin balor. Pero ora mi a konosé Kristu, mi a realisá ku mi balor no ta den loke mi ta hasi. Mi balor ta den Dios, ku ta stima mi manera mi ta. I mi ta kere ku niun hende no por stima mi manera Dios stima mi.” Di e perspektiva aki, Ilonka ta splika kiko nan ta hasi konkretamente: “Nos ta traha riba e parti di edukashon i tambe e parti sosial. Nos ta organisá eventonan ku ta duna wèrfano i hóbennan un oportunidat pa bini huntu Nos ke ta un bendishon pa nan”. Ilonka ta bisa. Ilonka ta splika: “Mas bien, ora mi ta organisá un evento sosial, e ta spesífikamente pa wèrfano. Mi tin hendenan spesífiko ku ta sostené mi. Por ehèmpel, tin empresarionan i tambe mi koleganan di trabou ku ta duna un man. Esakinan ta hende ku mi por yega serka dje strategikamente. Pero mi ta kere ku mi mester buska mas sosten, paso awor nos a bira ofisialmente un fundashon.” Ilonka ta kontinuá ku un klarifikashon di e desaroyo: “Pa hopi aña mi a kai bou di un iglesia, pero awor nos ta un fundashon ofisial. Esaki ta habri mas oportunidat pa nos haña yudansa finansiero. Hopi di e kosnan ku mi a logra i hasi te awor ta sali for di mi mes saku. Mi ta pone tur mi esfuerso pa yuda e wèrfanonan. Mané, durante e último añanan, mi tabata hasi paketenan pa skolnan di tas i tur loke e mucha tin mester pa skol.” Ilonka ta finalisá ku un mensahe: “Mi ta kere ku na e forma aki, si nos keda organisá i buska sosten, nos por logra yuda hopi mas hóben i mucha ku tin nesesidat.”
13 aña despues
Rowan ta bai su mes bek despues di 13 aña ku el a pèrdè su mama i e ta satisfecho. El a bisa “Ami ta kere ku tur loke bo ta pasa den bida tin su propósito. Mi tata tabata un ehèmpel fundamental pa mi. Mané un mucha hòmber, ta importante pa tin un pilar ku ta un hòmber. Mi tata tabata un lider ku tin un karakter hopi fuerte, i esaki el a mustra mi dor di su akshonnan. Mi semper tabata wak e den akshon, i asina mi tabata siña. Ora mi tabata tin duda, mi tabata pensa ‘kiko mi tata lo hasi?’. Rowan a ekspresá ku no solamente el a haña forsa den su tata, sino tambe den su Tata den shelu. “Awe, mi ta un hóben sigur di mi mes. Mi sa unda mi ta bai i mi tin un klaridat grandi riba e kaminda ku mi kier yega. Tantu den mi relashon ku Dios komo den mi deseo pa sirbi mi komunidat i mi pueblo. P’esei, awe mi ta sinti mi fuerte i sigur di mi mes”.
Rowan ta bisa “Pues, mi ta bisa ku un di e regalonan ku Dios a duna mi, ta pa prediká e bon notisia di Dios i tambe pa hasi orashon ku hende. Mi ta kere ku tur hende riba mundu tin un propósito. Tin bia mi ta kana riba kaya, i mi ta mira e nesesidat di hende fásil. Mi ta sinti den mi kurason ku mi tin ku kana yega serka e persona i yuda e, sea ta finansieramente òf ku un palabra di enkurashamentu. Mi ta bisa semper ku mi ta den e estudio di negoshi i mi mes ta den e proseso di lanta mi negoshi pa komunidat i pa yuda pueblo.” Rowan ta kontinuá ku un reflekshon: “Hopi hende ta bisa ku nos generashon ta un generashon pèrdí. Mi ta puntra mi mes ku si di bèrdat e generashon aki ta pèrdí òf si ta falta di guia. Mi ta kere ku si mi por ta un hóben ku tin influensia riba otro hóbennan, mi lo ke ta esei.”
Guia wèrfanonan
“Di promé, nos tin un página di retnan sosial ‘Youth Connect’ i tambe ‘The Chosen Generation’, Rowan ta kontesta. Kemen di e generashon pèrdí, nos ta e generashon skohí. Nos tin vários plannan, nos tin videonan di motivashon i spiritual. Un di e video nan aki a yega 40,000 views na komienso di aña. Hopi hende ta komentá, i hopi hende ku mi no konosé ta bisa: ‘Ei, mi a mira bo den video, e la impaktá mi.’ ‘Bo video a pone mi mira kosnan otro”. Rowan ta menshoná e plan pa 2025 kual ta pa sigui buta mas esfuerso den e página di retnan sosial. Ora esaki krese i bira mas, lo organisá eventonan na Ministerio pa poderá e hóben i grandi ku ta sinti e impakto. Nos ke krea personanan sigur di nan mes I tambe spiritual. Nos ke bai mas leu den futuro, pa siña e hende piska.
Mas wèrfano parti mama
Pa loke ta e wèrfanonan nan a splika ku esakinan ta mas di parti mama. ‘Esei ta loke mi a eksperensia hopi. Mi tin hopi yunan spiritual ku nan mama no tei mas’, Ilonka ta menshoná. Ilonka ta ekspresá ku “Ora bo tin bo mama, bo mester balor’é. Ora un hende bira wèrfano di parti mama, e lo sinti kon duru e lucha ta”. Un tata tin su responsabilidat, pero e kalor di mama tata no por duna. Pa kada yu ku ta rebeldiá kontra su mama, ta kometé algu hopi malu, paso bo ta kumprando maldishon riba bo bida. E mandamentunan ta bisa obedesé bo mama i bo tata. Ilonka ta bisa ku e ministerio ta basá riba e versíkulo Hakoba 1:27. Esaki no ta nifiká e edifisio, sino e kemen ami, e kemen abo, e kemne nos ku ta forma parti di e kurpa di Kristu. Berdadero ta pèrkurá pa e wèrfano i tambe estranhero. Ilonka ta bisa: “Ami ta yuda tur ora bai. Yuda den e sentido di enkurashá. Estranheronan tambe mi ta yuda hopi. Mi mes ta yu di Kòrsou, pero mi mayornan ta estranhero. Esei tambe a pasa ku nos famia”.
Por tuma kontakta ku “Tehillah Praise and Worship Ministries” via di 665-8962. Un otro manera ku por sigui e organisashon direktamente ta sintonisá e programa ‘Lanta Ariba’ na radio 98.5, tur djaluna, 5:30 di atardi.