WILLEMSTAD.- Ta bai hasi un aña ku karnaval 2020 ta tras di lomba i ainda Gobièrnu di Kòrsou no ke entregá e sèn ku a kobra di prekario na gruponan di karnaval.

Direktiva di AGKK i lidernan di grupo di karnaval ta sumamente rabia ku e situashon aki. No ta hañando masha klaridat kiko por a pasa ku mas di 200 mil florin di prekario ku a keda kobrá pa e departamento di ROP.

AGKK a komprondé ku despues ku e departamento di ROP (ántes DROV) a kita tur su gastunan for di e sèn di prekario a depositá e restante na departamento di finansa.

Presidente di AGKK, señor Henny Reinilla, a tuma kontakto ku Ministerio di Finansa i a risibí e informashon ku tur dokumento ku tin di aber ku prekario 2020 a keda konfiská pa un trahadó di ministerio di VVRP i nunka mas no a debolbé esakinan na departamento di finansa.

Na dos okashon minister Kenneth Gijsberta a deklará na un radio emisora ku e lo bai atendé ku e asuntu di prekario aki pa wak kiko por a bai robes, nada no a sosodé.

Direktiva di AGKK i lidernan di grupo di karnaval ta urgi minister Kenneth Gijsbertha pa tuma kontakto ku su kolega minister Zita Jesus-Leito kende ta responsabel pa e ministerio di Tráfiko, Transporte i Planifikashon Urbano, VVRP, pa resolvé e problema aki.

 

 

 

LAGA UN KOMENTARIO

Please enter your comment!
Please enter your name here