Potrèt ku e propio Donald Trump a pòst via di su telefòn, ta mustra e sospechoso drumí abou na suela despues ku el a keda detené.
WASHINGTON (AFP).- E hòmber akusá di a tira durante di un gala di medionan di komunikashon na kua e presidente norteamerikano Donald Trump a asistí, a keda prosesá ayera den un tribunal bou di akusashon di intento di a mata e mandatario i pa delitonan relashoná ku arma di kandela. Cole Allen (31) ta enfrentá un kastigu di hasta kadena perpetuo si e keda deklará kulpabel di intento di mata Trump durante e sena di koresponsalnan den White House, djasabra último na Washington.
Allen no a deklará su mes kulpabel ni inosente den e oudiensia den un korte federal den e kapital di Merka. Lo e keda detené te su próksimo aparishon den korte. Fiskal a bisa ku Allen tabatin un skopèt, un pistol semi outomátiko i tres kuchú ora ku el a purba pasa den seguridat di Hilton Hotel, kaminda e sena tabata tuma lugá. Despues di un interkambio kòrtiku ku e agentenan, el a keda detené na e lugá. Cole nunka a aserká Trump òf otro invitadonan ku tabata na e evento den e hotèl. Trump a publiká potrètnan dje hòmber ku mannan di bui drumí abou riba tapeit den e hotèl, lomba sunú.
White House malunan a tira falta riba “e kulto di odio di iskierda” pa e tiroteo i a akusá polítikonan demokrat ku a tira falta riba Trump di purba kontrolá podernan outoritario.
Trump a keda evakuá di forma hopi lihé pa agentenan di Servisio Sekreto. Imágennan di kámara di vigilansia a mustra e hòmber armá ta kore bai for di kontròl di seguridat na un piso riba e sala kaminda e gala a tuma lugá.
Den un entrevista den e programa “60 Minutes” di CBS, a puntra Trump si e tabatin miedu ku víktimanan lo a kai den e insidente. “Mi no tabata preokupá. Mi ta komprendé bida. Nos ta biba den un mundu loko”, segun e presidente a bisa.
