TALLASEE, ALABAMA, MERKA, AP.- Un hòmber armá a dal kontra un vehíkulo pafó di Walmart na Alabama djamars mainta, el a mata dos dama i despues a tira su mes.
E alkalde di Tallasee Johnny Hammock a bisa, miéntras un investigashon tabata desaroyando, ku e agresor a dal su outo intenshonalmente kontra un otro vehíkulo riba e tereno di parker di e tienda promé ku el a kuminsá tira.
Dos dama den e vehíkulo a muri, segun indikashon di e alkalde i a agregá ku e agresor a tira su mes.
E echonan aparentemente ta relashoná ku un disputa doméstiko i no tabatin peliger pa e públiko, segun indikashon di Matthew Higging, hefe di polis, na e medionan.
Outoridat no a dibulgá nòmber ni detaye di loke a pasa. Hammock a bisa ku e tres personanan tabata di un zona pafó di Tallasee.
Potrètnan a mustra un Nissan SUV blanku ku múltiple tiru den esaki.
