OXFORD, MERKA, AFP.- Un alumno di 15 aña a tira riba alumnonan i dosentenan na su skol na Michigan djamars, matando tres hóben i heridando ocho hende mas promé ku el a entregá na polis, segun indikashon di outoridatnan. Te ainda esaki ta e tiroteo di mas mortal den skolnan merikano e aña aki.
Ocho persona mas, inkluyendo un dosente, a wòrdu heridá den e atake ku a tuma lugá na momentu ku ainda tabatin lèsnan tumando lugá na Oxford High School, segun Ofisina di Shèrif di Oakland County.
E ofisina di Shèrif a bisa ku esnan ku a muri ta un hóben maskulino di 16 aña i dos femenino di 14 i 17 aña. Entre esnan heridá, seis ta stabil i dos mester a operá.
Outoridat a detené e sospechoso i konfiská un arma semi-outomátiko. Ainda outoridatnan no a establesé motibu di e atake na Oxford, un pueblo chikitu na nort di Detroit.
