Tirzo Martha Obra den eksposishon na Taiwan

237

E gran artista Tirzo Martha tabata resientemente na Taiwan den un eksposishon. Esaki tabata su promé bes na Taiwan i el a konta Djasabra di e eksperensia aki i kiko e eksposishon a trata. Tirzo Martha ta ko-direktor di Instituto Buena Bista, e instituto di arte na Kòrsou.

Promé bia na Taiwan

 

Tirzo a splika di a partisipá den un eksposishon ku a yama The Oceans and the Interpreter. Ta un eksposishon na un museo na Taipei. Na Taipei e kurador tabata hasi un investigashon riba e relashon di Karibe i paisnan asiátiko i a tende di e trabounan di Tirzo. E persona aki a bin Kòrsou na IBB i a bai na e atalier di Tirzo. El a gusta e trabounan i asina a invitá Tirzo pa un eksposishon na Taiwan. Tabata su promé biahe na Asia ounke na 2005 el a haña un invitashon pa China pero debí na skema asina okupá Tirzo no a bai. Den e kaso aki tabata un eksperensia fantástiko.

 

Emotion memories

 

E loke ta interesante di e tipo di trabou ku Tirzo ta hasi tin di aber ku konstrukshon na Kòrsou. Hende ta kuminsá traha kas i no ta kab’é, ta keda na flur i fundeshi so. I komo esaki ta un fenómeno internashonal, i na Taiwan tin e  mesun situashon i p’esei e kurador a haña esaki interesá i a invitá Tirzo pa traha un obra ku ta bai riba e tema ei. Asina el a traha e obra ku e “the Emotional Memory” i e ta bai kon un hende ke traha un kas pa protehá su famia pero no tin sèn i tiki tiki ta pone algun blòki, famia ta bin yuda i ta yega un kaminda ku tin hende no por kaba e kas. Pero tòg e aspekto emoshonal na e kas ta keda biba pasobra ta importante pa tin e kas i un dak riba kabes di nan famia. Ta algu ku bo ta haña rònt mundu entre otro na Taiwan tambe i asina el a keda invitá pa hasié na e pais ei. Asina el a bin ku e obra spesial.

 

Obra di 8 pa 6 meter

Tirzo a traha e obra spesífikamente na Taiwan mes. El a bisa ku e tabata un desafio pe pasobra normalmente pa e obra mester  a bin un muraya trahá di blòki di betòn. Komo na Taiwan tin hopi teremoto i mester a wak kon ta solushoná e aspekto ei. Si a traha e obra i si bin un teremoto e ta basha abou i kibra flur di museo. I na Asia tin blòkinan di foam i a opta pa usa eseinan pa traha e obra. Asina tin e kondishonnan ku Tirzo mes no a eksperensiá manera tene kuenta ku teremoto. Tambe tabatin e aspekto di kultura ku ta kompletamente diferente for di aki i Oropa kaminda Tirzo ta traha mas tantu. Aki  e hendenan ta bin i traha nan trabou, tuma nan almuerso i sigui traha te 5 or. Tin un disiplina i envolvimentu ku Tirzo a sinti ku e obra tabata mas di e hendenan ku a yud’é ku di e mes. Pa nan tambe tabata un desafio pa traha un obra grandi asina, ku den henter e eksposishon no tin nada asina. E obra ta 8 meter largu i 6 meter haltu.

 

Analisá situashonnan

 

I manera por a spera kada obra tin su mensahe ounke segun Tirzo tin bia e ta un krítika sosial òf análisis di situashonnan sosial i polítiko ku ta biba den komunidat. Tur bia su trabou tin di aber ku esei i p’esei hopi bia ora e ta hasi su trabou e ta envolví mas hende den e proseso di desaroyá e konsepto pa e obra. Por ehèmpel na Kòrsou simbolismo ta masha importante i e no tin nada ku e kosnan simbóliko ei pasobra  e ta kere den bida diario hende ta eksperensia kosnan di otro manera. I dor di esei hopi bia e ta traha ku diferente hende pa e haña e diferente referensianan. El a yega di hasi un ehersisio un bia kaminda e ta pone un glas di lechi i kada hende mester a bisa kiko e ta nifiká i pa kada hende e tin un nifikashon E ta kòrda tabatin algun hende di Etiopia den kampamentu di refugiado i pa nan e lechi ta representá morto pasobra mamanan ta tene nan yunan na pia i hinka e yu den barínan di lechi pa nan bebe i hopi bia e yunan ta hoga. Esaki ta nifiká ku ta diferente nifikashon i esei ta e kos di mas importante pa Tirzo.

 

 

Yen yen di eksposishon na kaminda

 

Tirzo ya ta yen yen otro aña  ku eksposishonnan. E tin sigur 3 proyekto na Ulanda i otro siman e tin un ta kuminsá na Kòrsou mes, loke ta sosodé despues di hopi aña. Otro aña e tin un solo grandi na Ulanda e tin Brasil otro aña. I 2024 tambe ta kasi yen ku eksposishon segun Tirzo.

Arte ta den tur kos

 

Pa loke ta arte e ta bisa ku hopi hende ta pensa ku no por gana nan pan ku arte pero esei no ta asina. Arte tin di aber ku tur kos, den kreashon di outo, pañanan bunita, edifisionan bunita, status grandi den edifisionan grandi ta arte. Den mundu di arte por gana bo pan normal meskos ku tur hende. E úniko kos ta si bo ta pensa den e forma tradishonal ku bo tin di traha un obra i bende, bo a limitá bo mes. Tirzo mes e trabounan grandi ku e ta traha no ta bende pero e tin otro forma pa e trabounan ei generá entrada pe pa e sigui gana su pan.

 

Studia na Ulanda

 

Instituto Buena Bista mes segun Tirzo ta bayendo bon. Maske a kaba di sali for di covid ku a pone ku tabata será hopi tempu, muchanan ku lès ‘online’, nan tabata kore kas pa kas hiba material pa e hóbennan por traha pero ta bayendo bon. Nan grupo ku tei ta fuerte i den desèmber ta kuminsá prepará ken ta bai studia i pa hasi nan petishon pa bai studia na Ulanda.

 

Studia arte

 

Tirzo a splika ku tin e interes pa studia arte i tin e interes pa hasi estudionan mas popular manera ‘game design’ i ‘comic design’  e mal interpretashon di kiko e estudio ta kontené ta stroba e hóben hopi bia. E ta kere ku si e ta gusta hunga ‘game’ e por bai studia ‘game’. Pero e estudio ta kompletamente otro. E estudionan ei tambe ta pensa 10 aña adelantá i loke ta popular awor aki no ta forma parti di konteksto di e estudio. Esaki ta algu ku nan tin di keda spliká. I tambe tin mayornan ta pensa ku e yu no por gana su pan ku arte i esei ta hasi e kos poko difísil. Te ainda nan ta kontentu ku finalmente e mayornan ta koperá i sostené i tur kos ta kana bon.

 

Fondo ta difísil

Pa loke ta fondo pa e instituto Tirzo Martha a bisa ku serka nan e supsidio hopi bia ta bin di Ulanda pero komo ku euro a baha ta un problema serio i nan ta pèrdè masha hopi sèn. Nan tin di traha presupuesto pa 3 aña pa haña supsidio i ta usa e tipo di kambio na e momentu ei. Pero e sèn a baha te kaminda ku nan tin problema ku ta pèrdè sèn. I e situashon ta bira mas pió pasobra diferente fondo na Kòrsou no tin sèn. Hopi empresa ku den pasado sa spònser i yuda nan, hopi dor di covid tin a sera nan porta. Awor aki e ta un situashon poko kompliká pa generá e fondonan pa asina por sòru pa e mucha por sigui haña lès. Tambe tin mayornan ku a pèrdè trabou i no tin e entrada manera promé pa e mucha por bai lès. Ta un situashon un tiki mas fèrfelu segun Tirzo.

 

Mensahe fuerte

Tirzo a bisa ku hende ta bisa e ta eskultor pero e no ta mira su mes asina. E ta traha i traha i dia e fayesé hende yegá na e konklushon kiko realmente e tabata. No ta Tirzo su preokupashon pasobra semper e ta buska e obra pa hasi e mensahe mas fuerte. Tirzo a bisa ku trahando ku e hóbennan na e instituto ta lag’é sintié yòn. E aña aki e instituto a hasi 16 aña.

 

LAGA UN KOMENTARIO

Please enter your comment!
Please enter your name here