Toastmasters a kuminsá komo hende hòmber i awor tin mas hende muhé

Ta masha hopi kos ta sosodé bou di e nòmber di Toastmasters. Na Kòrsou tin diferente Toastmasters pero tur ta kai bou di e mesun organisashon internashonal.  E bia aki nos ta papia ku representantenan di Toastmasters BNA (Banko Sentral). E aña aki Toastmasters BNA a kumpli 25 aña i tantu Aileen Lodowica- Martina komo Erwin Lobato ta den e klup for di su nasementu.

Aileen a konta kiko e organisashon ta; toastmasters BNA a keda lanta na 1995 1e di ougùstùs. El a kuminsá na yüni di e aña ei na momentu ku tabatin un organisashon di trabou Copal i e presidente a haña un presentashon i despues di e presentashon ei a laga nan di personal di Banko Sentral sera konosí ku un presentashon di Toastmasters. Einan el a splika e importansia di ta miembro di un organisashon ku yama Toastmasters. E organisashon aki mes tin 96 aña di eksistensia. Ta un organisashon hopi grandi i Kòrsou ta e di tres pais ku a lanta un organisashon di Toastmasters den e kaso aki Simadan i esun di BNA a siguié. E temporada ku nan a lanta tabata pa e empleadonan di Banko sentral i despues ku tempu a habri pa asina nan famia, ruman, amigu i amiganan por a drent’e, Pero 60% tabata personal di BNA i 40% invitadonan ku nan ta trese den e organisashon.

Liderazgo ta importante…

Erwin Lobato ta un di e poko nan den e organisashon di Toastmasters BNA. Esaki ta algu ku nos no a kustumbrá masha kuné, esta ku hende hòmber ta forma parti di e tipo di organisashonnan aki. Erwin Lobato tambe tei for di lantamentu di e klup. El a bisa ku e ta importante pe debí na e tarea i e funshon ku e tin na Banko Sentral. E tin di komuniká ku hende, tantu empleadonan, koleganan komo e personanan ku tin di komuniká kuné pafó di BNA. E benefisio ku e tin ku Toastamasters ta ku e por formulá su idea i presentá e idea di tal sistema ku esun ku ta skuch’é, no ta importá su nivel di edukashon, e por kapta su mensahe. Esei a yud’é hopi. Esei a yud’é entre otro e reunionnan di skol di su yu, na momentu ku si e ta den un  ke otro situashon, e por splika su mes fásilmente. E ta kòrda un bia na airopuerto tabatin tardansa i hendenna reboltoso pero e manera ku el a presentá na esnan na bali, nan por  a komprondé i e por  a hiba e mensahe na esnan rabiá i asina fria tur kos. Erwin Lobato ta konsiderá su mes komo un lider. Esei ta un di e metanan di Toastmasters esta guia pa e ta un lider. E organisashon ta duna e oportunidat ora e presentá loke el a siña for di e buki den un ambiente amikal. I kaminda e ta keda evaluá i asina e por sigui krese riba dje. No un evaluashon pa tene abou.

Programa a kambia…

Den 25 aña di Toastmasters segun sra. Aileen, loke sigur a kambia ta e programa. Nan ta yam’é Legacy pasobra nan tabatin manualnan kaminda ta hasi hasi 10 proyekto i sigui avansá i ta kuminsá na un nivel abou i tiki tiki krese. E programa aki ta for di tempu Toastmaster a kuminsá i na 2018 e programa a kambia. Tur e añanan ei tabatin manual ku ta bin aserka. E organisashon mama tabata trese kosnan nobo pa e miembronan krese i desaroyá nan mes den komunikashon i liderazgo. Bo ta skohe sea liderazgo òf komunikashon. Pero awor aki nan tin un programa nobo …..i e ta yuda bu forma bo mes pa e persona ku bo ta. Bo tin di hasi un assessment ku 11 ‘pad’ ku e sistema ei mes ta determiná ku ata kuadra ku e persona. Ta 11 ‘pad’ tin pero ora hasi e ‘assessment’ e sistema mes ta hiba bo ta e pad ku ta kuadra ku bo personalidat.

Mentor i menti…

Tur miembro nobo ku registrá ta pasa dor di un sistema di pregunta. Ta hasi 10 pregunta i a base di  e kontesta e ta duna un indikashon pa sigui krese den dje. Den Toastmasters tin mentor i menti, ku por sierto ta denominashonnan antikuá pero ta us’é ainda, e mentor tin di duna esun ku drenta nobo, guia i informashon i si e menti tin pregunta tokante su tarea e tin di haña e informashon pa e sigui krese. E intenshon di e mentor ta pa laga e menti krese i no keda kana kuné na man. E tin di dun’e informashon nesesario pa e bira independiente.

COVID a trese nan huntu…

Aileen a splika ku tur klup na reuní kaminda tin tareanan. Ora e menti bai reunion e ta sera konosí i ta sinta ku su mentor i splik’é kon e programa ta kana. Kada un reunion tin tarea i tin un ku ta dirigí e reunion, un ku ta duna palabra di dia, evaluashon, evaluadó general . tin diferente tarea den e reunion i un persona tambe ku ta tene tempu pa kuminsá na tempu i kaba na tempu. E reunionnan ta para pa kuminsá i kaba na tempu. Tur aktividat ku nan tin ta algu ku nan ta para riba dje. Awor aki komo tin e pandemia di COVID-19 nan ta reuní via di Zoom. Esei tambe segun Aileen ta algu inovativo pa nan. Nan mester a siña traha ku Zoom i el a bira parti di nan reunion. E organisashon mama a aploudí e sistema ku nan ta funshon a aki i a duna premio na e klupnan ku a sigui apesar di Covid. Nan tin diferente entrenamentu ta tumando lugá i e COVID asta a trese nan mas serka di otro. Aileen a bisa ku entrenamentunan awor ta tuma lugá ku miembronan di otro pais.

Eksigensianan…

Pa loke ta e eksigensianan pa forma parti di Toastmasters, sr. Lobato a bisa ku esun di mas importante ta e persona mester tin gana di krese, gana di bai dilanti. Despues ta wak e edat, sigur mayor di edat 18 aña, e mester por tin entrada pa kubri e mínimo di inskripshon i e mínimo di miembresia ku e tin di paga na e organisashon internashonal. I esun mas prinsipal ta e gana di krese i gana di bai dilanti i asina e por ta den e organisashon. Toastmasters no ta un organisashon pa sali hasi nèchi kuné. Na momentu ku e persona afó mira un Toastmasters ta kuminsá eksihí ku mester por hiba palabra, mester por dirigí na un persona na manera korekto, formulá pensamentu i duna guia. No ta algu ku asina bo tin e pin bo ta kla i ta drenta tur kaminda fásil. E persona mester traha.

Tiki hende hòmber…

No tin hopi hende hòmber den Toastmasters. Pero el a kuminsá komo un organisashon pa hende hòmber i despues di basta aña un hende muhé a bira miembro di Toastmasters. Historia ta mustra ku e persona ei a aparentá di ta hende hòmber pa e bira miembro pero awor e kos a bòltu i awor tin mas hende muhé den e organisashon. I no solamente na Kòrsou pero den Karibe e situashon ta asina. Erwin Lobato ta asistí na hopi reunion den Karibe i el a tende e remarke ei di tiki hende hòmber. Nan ta hasi esfuerso pa atraé e hende hòmber den e organisashon. Dia 24 awor nan tin un evento ku yama Pamper the Man i asina ta purba di haña mas hende hòmber. Nan ke e hende hòmber wak kiko e organisashon ta kome i bebe. E hende hòmber por lo general no ta gusta komuniká, e ta duna mandato, e no ta deliberá i den Toastmaster no tin e kosnan ei.

Miembresia no ta fásil…

No ta fásil pa haña miembro por lo general tampoko pa Toastmasters. Aileen a bisa ku den su kaso e ta manda hopi invitashon, papia di Toasmasters. E ta keda konsientisá kon bon e organisashon ta. Pa nan kada miembro aserka ta un rikesa. E organisashon mama ta wak hopi kos i pa un klup ta salú e mester tin 20 miembro. Bou di e kantidat ei e ta bou di miembresia. I tin klup ta den e situashon ei i tin di haña guia pa nan por bin bèk. No ta simplemente tin klup pa forma nan mes den liderazgo i komunikashon pero mester tene kuenta ku hopi kos. Tin klup ku a traha duru, miembronan asta a haña premio pero komo nan ta bou di miembresia nan no ta haña e rekonosementu. Den kaso di Toastmasters BNA aktualmente nan tin nèt 20 miembro i no mag i baha bou di dje. I p’esei nan ta keda mustra riba e balor di e klup.  Ta hopi kos ta sosodé den Toastmasters segun Aileen. Na Kòrsou tin 21 klup i nan ta parti den diferente área. I ta mundialmente tur organisashon ta lucha pa haña miembresia. I awor aki Rotary Club a djòin Toastmasters. Mester uni forsa pasobra nan tur ta para pa liderazgo i dor di uni ta logra mas.

Dikon drenta Toastmasters…

Si bo ke desaroyá riba e tereno di komunikashon, Komunikashon di papia ku hende. Si bo ke haña rekonosementu di esun ku bo ta papia kuné, bo ke formulá bo idea, si bo ke krese riba e parti di liderazgo, duna guia, manehá ta na Toastmasters bo mester ta. No solamente den buki pero ta haña e plataforma nesesario pa práktika esei.