Toastmasters Baden Powell Desaroyo, liderato i komunikashon

975

Den Djasabra e siman aki nos tabatin bishita di presidente Laurellla Martis i tesorero Regis Mercera. Nos a sera konosí un tiki mas ku Toastmasters Baden Powell, kiko ta nan meta i hopi mas ku tur nan aktividatnan. Regis Mercera, Toastmasters ta un gama di un klup edukativo kaminda un hende ku ke djòin e organisashon ta kuminsá komo hende ku no por papia dirigí palabra na un públiko òf un oudiensia, i despues tiki tiki ta desaroyá su mes dor di skucha i papia den públiko i trata na konsentrá. Tambe ta evitá di usa sierto palabranan ku konektá ku otro ku ta stroba e ‘vlotheid’. Ta trata na pone e hende pa papia mas mihó. E hende mes tambe ta desaroyá no solamente komo un hende ku por komuniká i skucha, pero tambe un hende ku por ta un lider pa komunidat. E klup su meta ta pa forma lider i e lider ta un hende ku mester por komuniká bon. E fundeshi di toastmasters ta formashon di lidernan pa futuro.

Puntuashon haltu pa 3 aña

 

Toastmasters Baden Powell ta eksistí pa 5 aña kaba. Laurella tambe tin 5 aña den dje. I den e pandemia último 2 aña e desaroyá tòg a bai bon. Segun Laurella nan a sigui traha riba desaroyo di e klup entre otro riba e parti di puntuashon. Pa 3 aña nan tabata President Distinguished i pa e aña aki tambe nan ta bai pe. Ta e nivel di mas haltu den Toastmasters. Meskos ku tin puntuashon na skol segun Laurella, meskos tin den nan organisashon. Ta kuminsá tiki tiki i poko poko i nan tambe, 5 aña pasá a kuminsá poko poko pero último 3 aña nan ta Presidente Distinguished. Ta un logro basta haltu i nan ta orguyoso di dje.

Regis a bisa ku e ta algu importante pa e klup pasobra ta e desaroyo di e klup i su miembronan ta pone ku nan ta haña e puntuashonnan aki. E desaroyo di hende i e kaminda ku e ta kana den dje pa e desaroyá su mes i kada bes dependé di e situashon ku e hende kaba, e ta haña kantidat di punto. Na 9 punto ta bira Presidente Distinguished i por yega te 10 punto ku te esun máksimo.

 

Un meskla di edat

Toastmasters Baden Powell a bisa ku nan miembro di mas hóben tin 21 aña i esun di mas edat ta e ‘senior’ ku ta penshonadonan ku a pasa 60 aña. Esaki ta pone ku nan tin un variedat di hende, no hende yòn so ni hende di edat so, pero un meskla masha bunita segun Regis i e dushi di e klup aki ta ku tur e hendenan aki ta drenta otro. Un ta yuda otro, esun di mas eksperensia ta yuda esun mas hóben i esei ta nan moto. Nan ta yuda otro pa krese huntu. Pa nan tur hende mester krese huntu i bai dilanti.

 

A lanta dor di un hóben

 

E idea di Toastmasters aki a kuminsá ku un hóben ku a aserká otronan miéntras ku Regis tabata den direktiva di Skouting Antiano i ora nan a haña e idea, a asept’é i huntu ku skouting nan a buska spònser i asina Toastmasters Baden Powell a lanta. Esun ku a lant’é a sigui studia despues pa Ulanda pero el a laga un bon fundeshi atras.

 

Presentá kiko el a siña

E enkuentronan ta dos bia pa luna. Riba e promé i di tres djamars di luna na JCC pa 7 pa 9 or anochi. Einan e presidente ta habri i despues ta hasi orashon i kada hende, esun ku ta deseá na tene un diskurso ta hasié. Na momentu di e diskurso e persona ta keda evaluá i na final ta haña sa kiko a bai bon i kiko ménos bon. E hende ta haña un bon punto i un ménos bon pa e sa kiko e tin di traha riba dje. Ta trata di un sistema ‘Pathways’ ku ta un sistema elektronikamente digital i ku diferente modalidat. E miembro ta siña hopi manera kon e ta komuniká, su vishon pa komuniká ku otro, ‘path’ humorístiko  asina tin diferente ‘path’. E parti elektróniko e miembro ta kuminsá na nivel 1 i kaba na 5 i meimei di dje tin diferente graduashon i kada un ta sigui progresá den dje.  Ku kada kurso ta terminá ku un diskurso ku e miembro mester tene, ku ta parti di un tarea/ i esaki ta tuma lugá den e reunion edukashonal. E evaluashon mester ta positivo semper asina Regis a enfatisá.

 

Interes di hóbennan

 

Pa loke ta e interes di hóbennan, Laurella a bisa ku esaki ta varia. Nan ta konsiente ku no ta haña hóben fásilmente i den e kaso aki nan a lanta dirigí pa e hóben di Baden Powell. I p’esei nan a disidí di ampli’é pa rònt Kòrsou por forma parti di e klup. Ta motivá e hóben pa asina logra haña e hóben drenta. No tur bia segun Laurella e ta bai asina fásil. E interes ta varia serka e hóben pero una bes e kana yega e klup, e ta keda. Ora e hóben haña e konosementu di e benefisio ku e tin dor di ser miembro di Toastamasters Baden Powell, e ta yega asina promé ku esnan di mas edat.

 

Pa lanta interes serka hóbennan Regis ta kere ku mester kuminsá for di skolnan, kaminda por trata na haña e hóben dor di duna nan un seshon di entrenamentu di liderato. I un entrenamentu asina aki por hasi kisas den wikènt i asina logra gana e interes di e hóben. Den e seshonnan aki e hóben ta haña  e persepshon di lider i kon e ta komuniká i ta un lider. I na final di e seshon ta evaluá e hóben i gan’é den e sistema di Toastmasters. Ta importante pa un hende, dependé ki nivel e tin, pro komuniká bon, pensa i skucha hende. Hopi bia nos no ta skucha e hende pasobra nos ta papia pareu ku e hende.

 

Kuantu tempu

 

Kuantu tempu un miembro mester dediká den e organisashon di Toastmasters. Laurella a bisa ku esaki ta keda na kada ken kuantu e ke hinka den dje. E no ta mará na tempu ni orario. Ta dependé ora lesa e trayekto ku bo ke pasa aden, bo ta hasi bo investigashon pa wak ki proyekto bo ke trese dilanti i kon ke kan’é.

 

Enkuentronan ku otro klup

 

Toastmasters Baden Powell tin 21 miembro ofisial pero e aña aki a pone pa nan yega sigur 30 miembro. Laurella a bisa ku nan no tin un máksimo di miembresia. I nan organisashon ta tene enkuentro ku otro organisashon den nan forma. Kada klup tin su kultura i ora hasi e enkuentronan ku otro, ta siña konosé otro, otro sistema. Pa loke ta e idioma, Laurella a bisa ku nan ta dirigí nan reunionnan na papiamentu pero tambe na ingles pasobra kompetensianan afó ta na ingles. Pero tambe nan ta hinka spañó den dje.

 

Dia 16 di ougùstùs nan tin nan promé reunion edukashonal. Asina nan ta habri nan reunion di aña. Tur hende ta bon bini na e reunion aki na JCC pa 7 or di anochi. I meskos ku tur reunion tin su tema, esun di dia 16 ta vishon pa asina tur hende sa kiko ta nan vishon pa e aña aki. Por tuma kontakto ku Vise Presidente di Miembresia – Sra. Omara Martina na telefòn – 515-6659, 520 1749 òf e-mail na toastmasterclubbadenpowell@gmail.com

 

Bai pa lo máksimo

 

Pa loke ta nan vishon Regis a bisa ku esei ta pa nan krese. Nan ke bira un mihó toastmasters club i tambe pa ta hopi bon i bai pa e máksimo Presidente Distinguished e aña aki. Nan ke yega na e puntuashon 10. Pa nan esaki ta un satisfakshon pasobra nan tin nan reunionnan di distrito di Caribe i un par di bia pa aña tin sierto aktividat. Komo nan ta virtual, komo distinguished president nan ta keda pone den spotlight. Nan tabata diferente bia den spotlight komo krese den miembresia, e klup ku mas punto i tambe nan miembronan tambe a progresá ta keda poné den spotlight. Esei ta un satisfakshon pasobra e ta mustra ku bo ta progresá i krese komo klup i tim.

Mas hende muhé

 

Loke a hala atenshon ta ku den e klup aki tambe ta e damanan a dominá. Pa Laurella i Regis, serka nan klup e asuntu di hende muhé i hende hòmber miembro ta basta balansa kompará ku otro klupnan.

 

Direktiva

 

Baden Powell Toastmasters Club a instalá su direktiva nobo pa aña 2022 -2023. E direktiva di ta konsistí di: President – TM Laurella Martis

Vice President Education – TM Farrahnedy Nicastia

Vice President Membership – TM Omara Martina

Vice President Public Relations – TM Ryjairo Kleinmoedig

Secretary – TM Wystlina Helena

Treasurer -TM Regis Mercera

Sergeant at Arms – TM Lorna Fraai-Browne

Immediate Past President – TM Zoraida Pisas

 

 

 

 

 

 

LAGA UN KOMENTARIO

Please enter your comment!
Please enter your name here