NEW YORK, MERKA, AFP.- E alkalde di New York, Bil de Blasio, a anunsiá ku e toque de queda den e siudat lo kuminsá djamars desde 8or di anochi, despues ku Manhattan a bira esenario di vários sakeo den oranan di anochi, spesialmente tiendanan di luho.
Tiendanan di marka manera Nike, Michael Kors i Lego i otro aparatonan elektróniko den kurason di Manhattan a wòrdu sakea pa un grupo grandi di hóben djaluna anochi, segun indikashon di periodistanan di AFP.
Un siman despues di e morto di George Floyd, e protestanan a ekstendé di kosta pa kosta di Merka i e manifestashonnan pasífiko a terminá den disturbio. Floyd di 46 aña a wòrdu sofoka pa un agente polisial durante su detenshon na Minneapolis.
Presidente Donald Trump a primintí ku lo restourá òrdu i a menasa e estadonan ku lo desplegá militarnan pa “drecha e problema aki rápidamente” si e aktonan violento no baha.
E alkalde di e siudat a bosa ku e situashon ta inaseptabel i a anunsiá ku lo amplia e tregua vigente.
Vários besindario di New York a sufri dor di e sakeonan den fin di siman, spesialmente Soho, kual a kousa ku e alkalde di e siudat i gobernador di Estado Andrew Cuomo a dekretá e toque de queda.
