‘Toque de queda’ ta kuminsá awe nochi na Kòrsou

Personanan infektá ku Covid-19 na Kòrsou a yega 9

WILLEMSTAD.- Gobièrnu di Kòrsou pa medio di minister presidènt Eugene Rhuggenaath i dr. Izzy Gerstenbluth a tene e seshon di informashon na komunidat, di awe djasabra, den kua a informá ku e kantidat di personanan infektá a subi ku 1 i yega 9. Pues awor Kòrsou a registrá su di nuebe hende infektá ku Covid-19. Rhuggenaath a anunsiá ku entrante awe djasabra 28 di mart ta drenta na vigor ‘toque de queda’ ku ta kore di 9’or di anochi te 6’or di mainta.

Dr. Gerstenbluth a duna di konosé ku tin algun tèst ku nan a hasi pero ku e resultadonan no a drenta ainda. Echo ta ku un di e kasonan ku tabata pendiente a resultá negativo. Tin un otro kaso di un persona ku a tèst positivo i esei mester a keda hospitalisá. Awor ma ku nunka ta importante pa keda mantené distansia for di otro, esei ta e mihó manera pa evitá ku ta plama e vírus. No ta importá ku hende no ta infektá, tòg tene distansia.

Si no tuma niun medida i laga e epidemia tuma su kurso, nos lo haña un situashon ku ta bai bira pió, ku hopi hende infektá i esei lo nifiká ku e lo surpasá e kapasidat ku pais tin pa atendé ku kasonan manera aksidente di outo, hende ku haña ataka di kurason etc. Si surpasá e kapasidat di kuido disponibel mas hende lo haña daño, mas hende lo sufri i lo muri pasobra no tin kapasidat pa atendé ku nan. P’esei mester hasi tur esfuerso pa nos no alkansá e liña kritiko ei.

P’esei a stòp di laga hendenan drenta Kòrsou i sigur di paisnan ku tin hopi kaso di hendenan infektá.

E kantidat di hendenan infektá ketu bai ta keda isolá. E sifranan ku ta presentá ta mustra ku 80% ta kasonan leve, 15% mas severo i 5% ta e kategoria mas severo. Den e 5% ei tin hende ta bai kuido intensivo i tambe hendenan ku ta muri. Un manera ku Gerstenbluth ta mira ku na Kòrsou no tin hendenan ta infektá otro, ta e situashon den hospital. Na hospital ta tèst mas tantu hende i nan ta ketu bai na 0. P’esei e mensahe ta tene distansia pa evitá ku ta transmití e vírus di un hende pa oro.

Minister presidènt Eugene Rhuggenaath a informá ku un medida nobo ta ku for di djaluna awor 30 di mart tur persona ku ta biba na Kòrsou, pero ta den eksterior ainda no por drenta Kòrsou mas. Kuminsando djaluna awor ta solamente hendenan ku tin sierto funshon hopi nesesario i ku tin un karta di gobièrnu pa esei, por drenta nos pais.

Otro medida ta kuminsando awe djasabra 28 di mart ta drenta na vigor un ‘avondklok’, ‘toque de queda’ ku ta nifiká ku niun hende no por ta riba kaya despues di 9’or anochi. Minister presidènt no a indiká kiko ta e but pa esnan ku gara entre 9’or anochi i 6’or di mainta. Mas detaye den edishon di EXTRA.

 

SHARE

LEAVE A REPLY