MIAMI, AP.- E tormenta tropikal Julia, a basha basta áwaseru djárason riba nortost di Florida i gran parti di e kosta di Georgia. Pero den mayoria di e áreanan e efekto tabata mínimo.Skol i ofisinanan di gobièrnu a keda habrí, miéntras e tormenta a pasa pa Jacksonville i a avansá pa nort. Esaki a trese áwaseru i bientu tropikal den gran parti di sùit di Georgia. E tormenta a forma djamars atardi dilanti kosta atlántiko di Florida.
Julia tabatin su sentro na nortost di Brunswick, Georgia pa 11’or di mainta i a desplasá rumbo nortost. Su bientu máksimo tabata serka di 65 kilometer pa ora. E tormenta aki lo mester a pèrdè forsa i kombertí den un depreshon tropikal mas atardi.
A reportá inundashonnan djárason mainta na Brunswick, Georgia i na Sea Island. Bientunan di Julia a basha algun rama i a kousa ku koriente a kai afó riba e Isla St. Simmons, segun Jay Wiggins, funshonario di emergensia di kondado Glynn.
Funshonarionan di kompania Georgia Power a bisa ku ménos di 100 kas i negoshi tabata sin elektrisidat djárason mainta, a lo largo di un tramo di 60 kilometer di kosta di Georgia entre Brunswick i Savannah.
